സ്‌കൂളില്‍ നൽകിയ എസ്.എസ്.എല്‍.സി സര്‍ട്ടിഫിക്കറ്റ് കാണാതായെന്ന്​ പരാതി

നെടുങ്കണ്ടം: പഠനത്തോട്​ അനുബന്ധിച്ച തൊഴില്‍ പരിശീലനത്തി​ൻെറ ഭാഗമായി സ്‌കൂളില്‍ ഏല്‍പിച്ച എസ്.എസ്.എല്‍.സി സര്‍ട്ടിഫിക്കറ്റ് നഷ്​ടപ്പട്ടതായി പരാതി. നെടുങ്കണ്ടം ഗവ. വൊക്കേഷനല്‍ ഹയര്‍ സെക്കൻഡറി സ്‌കൂളില്‍ തൂക്കുപാലം സ്വദേശി ഷാല്‍വിന്‍ മധുവാണ്​ സര്‍ട്ടിഫിക്കറ്റ് ഏല്‍പിച്ചത്. സ്‌കൂളിലെ വി.എച്ച്.എസ്​.ഇ വിദ്യാർഥിയായിരുന്നു ഷാല്‍വിന്‍. പഠനത്തോട്​ അനുബന്ധിച്ച തൊഴില്‍ പരിശീലനത്തി​ൻെറ ഭാഗമായാണ് സര്‍ട്ടിഫിക്കറ്റ് നല്‍കിയത്. എന്നാല്‍, പഠനം പൂര്‍ത്തീകരിച്ച്, ബിരുദത്തിന് ചേരുന്നതിന് മുന്നോടിയായി സര്‍ട്ടിഫിക്കറ്റ് തിരികെ ആവശ്യപ്പെട്ടപ്പോള്‍ സ്‌കൂളില്‍ ഇല്ല എന്ന മറുപടിയാണ്​ ലഭിച്ചതെന്ന്​ രക്ഷിതാവ്​ പറയുന്നു. തൊഴില്‍ പരിശീലന സമയത്ത്, കുട്ടികള്‍ക്ക് സൗകര്യം ഒരുക്കിനല്‍കാത്തത് ചോദ്യം ചെയ്തിരുന്നെന്നും ഇക്കാരണത്താല്‍ സര്‍ട്ടിഫിക്കറ്റ് ബോധപൂര്‍വം നഷ്​ടപ്പെടുത്തിയതാണെന്നുമാണ്​ രക്ഷിതാവി​ൻെറ ആരോപണം. വിദ്യാഭ്യാസ വകുപ്പിലെ ഉന്നത ഉദ്യോഗസ്ഥര്‍ക്ക് പരാതി നല്‍കാന്‍ ഒരുങ്ങുകയാണ് ഷാല്‍വിന്‍. എന്നാല്‍, തൊഴില്‍ പരിശീലന സമയത്ത് ഷാല്‍വിന്‍ സര്‍ട്ടിഫിക്കറ്റ് നേരിട്ടാണ് പരിശീലന കേന്ദ്രമായ കെല്‍ട്രോണില്‍ ഹാജരാക്കിയതെന്നും സ്‌കൂളില്‍ നൽകിയിട്ടില്ലെന്നും സ്‌കൂള്‍ അധികൃതര്‍ അറിയിച്ചു.