പ്രകൃതിദുരന്തം: ചികിത്സ ചെലവ് സർക്കാർ വഹിക്കണം –ഡീൻ കുര്യാക്കോസ്

തൊടുപുഴ: കൊക്കയാർ പഞ്ചായത്തിലുൾപ്പെടെ കഴിഞ്ഞ ദിവസങ്ങളിലുണ്ടായ പ്രകൃതിദുരന്തങ്ങളിൽ പരിക്കേറ്റവർക്ക് സ്വകാര്യ ആശുപത്രിയിലേതടക്കം മുഴുവൻ ചികിത്സ ചെലവും സർക്കാർ വഹിക്കണമെന്ന് ഡീൻ കുര്യാക്കോസ് എം.പി. 11പേർ മരിക്കുകയും ഒരാളെ കണ്ടുകിട്ടാനുമുണ്ട്. നിരവധിപേർക്ക്​ പരിക്കേൽക്കുകയും 200 വീടുകൾ പൂർണമായും 400 വീടുകൾ ഭാഗികമായും തകരുകയും 160 ഹെക്ടറോളം ഭൂമിയിലെ കൃഷി നശിക്കുകയും ചെയ്​തു. സർക്കാർ പ്രഖ്യാപിച്ച ധനസഹായം അപര്യാപ്​തമാണ്​. വീട് നഷ്​ടപ്പെട്ടവർക്കും കൃഷിനാശം സംഭവിച്ചവർക്കും നഷ്​ടപരിഹാരം നൽകണമെന്നും മുഖ്യമന്ത്രിക്ക് നൽകിയ കത്തിൽ ആവശ്യപ്പെട്ടു. ഭൂമിപതിവ് ചട്ടം ഭേദഗതി: യു.ഡി.എഫ് കലക്ടറേറ്റ്​ മാർച്ച്​ നടത്തും തൊടുപുഴ: ഭൂമിപതിവ് ചട്ടങ്ങൾ ഭേദഗതി ചെയ്യണമെന്നാവശ്യപ്പെട്ട് കലക്ടറേറ്റ്​ മാർച്ച്​ നടത്താൻ യു.ഡി.എഫ് ജില്ല ഏകോപന സമിതി യോഗം തീരുമാനിച്ചു. ഭൂമിപതിവ് ചട്ടങ്ങൾ ഭേദഗതി ചെയ്യാനുള്ള സർവകക്ഷിയോഗ തീരുമാനം നടപ്പാക്കാത്തതിൽ യോഗം പ്രതിഷേധിച്ചു. ഇടുക്കി പാക്കേജ്​ വിഷയത്തിൽ സർക്കാർ തരംതാണ രാഷ്​ട്രീയം കളിക്കുകയാണെന്ന്​ യോഗം കുറ്റപ്പെടുത്തി. പുതുതായി ചുമതലയേറ്റ ഡി.സി.സി അധ്യക്ഷൻ സി.പി. മാത്യു, കേരള കോൺഗ്രസ് ​സംസ്ഥാന വൈസ്​ പ്രസിഡൻറ്​ മാത്യു സ്​റ്റീഫൻ, സി.എം.പി ജില്ല സെക്രട്ടറി കെ.എ. കുര്യൻ എന്നിവരെ അനുമോദിച്ചു. ഡീൻ കുര്യാക്കോസ് ​എം.പി ഉദ്ഘാടനം ചെയ്തു. ജില്ല ചെയർമാൻ അഡ്വ. എസ്​. അശോകൻ അധ്യക്ഷതവഹിച്ചു. അഡ്വ. ഇബ്രാഹീംകുട്ടി കല്ലാർ, എം.എസ്​. മുഹമ്മദ്, പ്രഫ. എം.ജെ. ജേക്കബ്​, കെ. സുരേഷ് ബാബു, എം.കെ പുരുഷോത്തമൻ, പി.എം അബ്ബാസ്​, അഡ്വ. ജോസി ജേക്കബ്, എം.എം ബഷീർ, മാർട്ടിൻ മാണി, രാജു മുണ്ടക്കാട്ട്, സി.കെ. ശിവദാസ്​, കെ.എം മൈതീൻ, എൻ.ഐ. ബെന്നി, ജോയി കൊച്ചുകരോട്ട്, എം.ബി. സൈനുദ്ദീൻ, തുടങ്ങിയവർ സംസാരിച്ചു. സ്​കൂൾ തുറക്കൽ: മുൻകരുതലിന്​ നിർദേശം തൊടുപുഴ: കനത്ത മഴയുടെയും കോവിഡ് സാഹചര്യങ്ങളുടെയും പശ്ചാത്തലത്തിൽ സ്​കൂളുകൾ തുറക്കുമ്പോൾ ആവശ്യമായ മുൻകരുതലുകൾ എടുക്കാൻ നിർദേശം നകിയതായി തൊടുപുഴ നഗരസഭ ചെയർമാൻ സനീഷ് ജോർജ്​ അറിയിച്ചു. നഗരത്തിലെ ഭൂരിഭാഗം റോഡുകളിലും സീബ്രാലൈനുകളും സൈഡ് ലൈനുകളും അപ്രത്യക്ഷമായിട്ടുണ്ട്​. ഇൗ വിഷയം അടിയന്തരമായി പരിഹരിക്കാൻ പൊതുമരാമത്ത് വകുപ്പിന് കത്ത്​ നകിയതായും ചെയർമാൻ പറഞ്ഞു.