പെൺകുട്ടിയുടെ മുടി മുറിച്ച പ്രതി അറസ്​റ്റിൽ

പീരുമേട്: പ്രണയാഭ്യർഥന നിരസിച്ചതിനെത്തുടർന്ന് പെൺകുട്ടിയുടെ മുടി മുറിച്ച സംഭവത്തിൽ ഒളിവിൽ പോയ പ്രതി അറസ്​റ്റിൽ. കരടിക്കുഴി സ്വദേശി സുനിൽ കുമാറാണ് (23) പിടിയിലായത്. ഇയാൾ അയൽവാസിയായ പെൺകുട്ടിയുടെ വീട്ടിൽ എത്തി പ്രണയാഭ്യർഥന നടത്തിയത്​ പെൺകുട്ടി നിരസിക്കുകയും യുവാവി​ൻെറ ശല്യം സഹിക്കാനാകാതെ സ്വയരക്ഷക്ക് കത്രിക എടുക്കുകയുമായിരുന്നു. ഇൗ സമയം സുനിൽകുമാർ കത്രിക പിടിച്ചു വാങ്ങി മുടി മുറിച്ചുമാറ്റുകയുമായിരുന്നു. കരടിക്കുഴി എ.വി.ടി തോട്ടത്തിൽ തിങ്കളാഴ്ച ഉച്ചക്കുശേഷമായിരുന്നു സംഭവം. വീട്ടിൽ മറ്റാരും ഉണ്ടായിരുന്നില്ല. പെൺകുട്ടിയുടെ ബഹളം കേട്ട്​ സമീപവാസികൾ എത്തിയപ്പോൾ പ്രതി ഓടിമറഞ്ഞു. മുമ്പ്​ പലതവണ ഇയാൾ പ്രണയാഭ്യർഥനയുമായി സമീപിച്ചതായും അപ്പോഴൊക്കെ നിരസിച്ചതായും പെൺകുട്ടി പൊലീസിൽ നൽകിയ മൊഴിയിൽ പറയുന്നു.