കട്ടപ്പനയിലെ നടപ്പാത; മന്ത്രിക്ക്​ നിവേദനം നൽകി

കട്ടപ്പന: നഗരത്തിലെ നടപ്പാതകൾ പുനർനിർമിക്കണമെന്ന ആവശ്യം ശക്തമായി. ഇക്കാര്യ ആവശ്യപ്പെട്ട്​ കേരള കോൺഗ്രസ് എം മന്ത്രി റോഷി അഗസ്​റ്റിന് നിവേദനം നൽകി. കട്ടപ്പന ടൗണിലെ നടപ്പാത നവീകരണവും പള്ളിക്കവല മുതൽ സ്കൂൾ കവല വരെ പുതിയ നടപ്പാത നിർമിക്കണമെന്നുമാണ് ആവശ്യം. കട്ടപ്പനയിലെ ഭൂരിഭാഗം വിദ്യാഭ്യാസ സ്ഥാപനങ്ങളും പ്രധാന ആശുപത്രിയുമടക്കം സ്ഥിതിചെയ്യുന്ന തിരക്കേറിയ ജങ്​ഷനാണ് പള്ളിക്കവല. കട്ടപ്പന പഴയ ബസ്​സ്​​റ്റാൻഡ് മുതൽ പള്ളിക്കവല വരെ നടപ്പാതയുണ്ടെങ്കിലും 15 വർഷത്തിനുമേൽ കാലപ്പഴക്കമുണ്ട്. കടപ്പന-പള്ളിക്കവല റോഡ് ദേശീയ പാതയുടെ ഭാഗമാക്കിയിട്ടും നടപ്പാതകൾ പുനർനിർമിക്കാൻ നടപടി സ്വീകരിച്ചിരുന്നില്ല. ആയിരക്കണക്കിന് സ്കൂൾ വിദ്യാർഥികളടക്കം ഉപയോഗിക്കുന്ന നടപ്പാത നവീകരിക്കണമെന്ന്​ ആവശ്യപ്പെട്ടാണ് കേരള കോൺ. എം കട്ടപ്പന മണ്ഡലം കമ്മിറ്റി മന്ത്രിക്ക്​ നിവേദനം നൽകിയത്.