ഒരു വര്‍ഷമായിട്ടും അടിത്തറയില്‍നിന്ന്​ ഉയരാതെ കമ്യൂണിറ്റി ഹാള്‍

-ഉടുമ്പന്‍ചോല പഞ്ചായത്തിലെ പാറത്താട് കമ്യൂണിറ്റി ഹാൾ നിർമാണമാണ്​ നിലച്ചത്​ നെടുങ്കണ്ടം: നിർമാണം ആരംഭിച്ച്്് ഒരു വര്‍ഷമായിട്ടും കമ്യൂണിറ്റി ഹാള്‍ അടിത്തറയില്‍നിന്ന്​ ഉയർന്നില്ല. ആറുമാസംകൊണ്ട് പൂര്‍ത്തീകരിക്കുമെന്ന്​ പ്രഖ്യാപിച്ച ഉടുമ്പന്‍ചോല പഞ്ചായത്തിലെ പാറത്താട് കമ്യൂണിറ്റി ഹാളാണ് പ്രാരംഭഘട്ടത്തില്‍ മുടങ്ങിയത്. അടിത്തറയിലെ കമ്പികള്‍ തുറസ്സായ സ്ഥലത്ത് ഉയര്‍ന്നുനില്‍ക്കുന്നത് അപകടസാധ്യത വര്‍ധിപ്പിക്കുന്നു. 2020 ജൂലൈയിലാണ് തോട്ടം മേഖലയായ പാറത്തോട്ടില്‍ ആയുര്‍വേദ ഡിസ്പെന്‍സറിക്ക് മുന്നിൽ​ കമ്യൂണിറ്റി ഹാൾ നിര്‍മാണം തുടങ്ങിയത്. എന്നാല്‍, ഒരു വര്‍ഷമായിട്ടും തുടര്‍നടപടിയില്ല. നിലവില്‍ പ്രദേശം കാടുപിടിച്ച നിലയിലാണ്. ഒരു കോടി രൂപയോളം മുതല്‍മുടക്കില്‍ നിർമാണം പ്രഖ്യാപിച്ച ഹാളി​ൻെറ നിർമാണമാണ് പ്രാരംഭഘട്ടത്തില്‍തന്നെ മുടങ്ങിയത്. ഉദ്യോഗസ്ഥരുടെ അനാസ്ഥയാണ് നിര്‍മാണം മുടങ്ങാന്‍ കാരണമെന്നാണ് ആക്ഷേപം. പദ്ധതി പൂര്‍ത്തീകരണത്തിന്​ ഗ്രാമപഞ്ചായത്തും നടപടി സ്വീകരിക്കുന്നില്ല. എം.എല്‍.എ ഫണ്ടും ജില്ല, ഗ്രാമപഞ്ചായത്തുകളില്‍നിന്നുള്ള ഫണ്ടുകളും സംയോജിപ്പിച്ചാണ് പദ്ധതി പൂർത്തീകരിക്കാൻ ലക്ഷ്യമിട്ടത്. പൊതുപരിപാടികള്‍ക്ക്​ ഓഡിറ്റോറിയം, സ്‌റ്റേജ്, ബാല്‍ക്കണി, ടോയ​്​ലറ്റ് കോംപ്ലക്‌സ് തുടങ്ങിയവ സമുച്ചയത്തില്‍ ഒരുക്കുമെന്നായിരുന്നു പ്രഖ്യാപനം. നിര്‍മാണ ചുമതലയുള്ള ഉദ്യോഗസ്ഥര്‍ക്ക് പദ്ധതിയുടെ കൃത്യമായ രൂപരേഖ സമര്‍പ്പിക്കാത്തതാണ് നിര്‍മാണം മുടങ്ങാന്‍ കാരണമെന്നും പറയുന്നു. ഗ്രാമപഞ്ചായത്തും അലംഭാവം തുടരുന്നതിനാല്‍ കമ്യൂണിറ്റി ഹാള്‍ അടിത്തറയില്‍ ഒതുങ്ങുമോ എന്ന ആശങ്കയിലാണ് പ്രദേശവാസികള്‍.