ഫണ്ടി​ല്ല; മലങ്കര ടൂറിസം പദ്ധതി പാതിവഴിയിൽ

Atn. P/4 Lead.. കാഞ്ഞാർ: ഫണ്ടി​ൻെറ അപര്യാപ്തതമൂലം മലമ്പുഴ മാതൃക ടൂറിസം പദ്ധതിയായ മലങ്കര പദ്ധതി എങ്ങുമെത്തിയില്ല. 10 വർഷം മുമ്പ്​ ഇടതുസർക്കാറി​ൻെറ കാലത്ത്​ മന്ത്രി കോടിയേരി ബാലകൃഷ്ണനാണ് പദ്ധതി ഉദ്ഘാടനം ചെയ്തത്. എന്നാൽ, മൂന്നുകോടി ചെലവിൽ എൻട്രൻസ് പ്ലാസയും കുട്ടികളുടെ ചെറിയൊരു പാർക്കും ബോട്ട്​ ജെട്ടിയും മാത്രമാണ് പൂർത്തിയായത്. വിനോദസഞ്ചാര, ജലസേചന വകുപ്പുകളും എം.വി.ഐ.പിയും സംയുക്തമായാണ് മലമ്പുഴ ടൂറിസം പദ്ധതിക്ക്​ സമാനമായ പദ്ധതി ആവിഷ്‌കരിച്ചത്. മുതിർന്നവർക്കും കുട്ടികൾക്കും വിനോദ കേന്ദ്രങ്ങൾ, വിശ്രമകേന്ദ്രം, മുട്ടം മുതൽ അറക്കുളം വരെ 11 കി.മീ. മലങ്കര ജലാശയത്തിലൂടെ സവാരി സാധ്യമാക്കുന്ന യന്ത്രവത്​കൃത ബോട്ടിങ്, ദുബൈ മോഡൽ എൻട്രൻസ് പ്ലാസ, പക്ഷിസങ്കേതം, വെള്ളം ചുറ്റിക്കിടക്കുന്ന തുരുത്തിൽ കൃത്രിമ വനം, വിസ്തൃതമായ പാർക്ക്, ആന-കുതിര-സൈക്കിൾ സവാരി, പൂന്തോട്ടം, അണക്കെട്ടി​ൻെറ ഇരുവശവും ബന്ധിപ്പിച്ച‌് റോപ‌് വേ, തീരങ്ങളിലൂടെ സൈക്കിൾ സവാരി, ഫുഡ‌്പാർക്ക‌്, ടൂറിസ‌്റ്റ‌് ഇൻഫർമേഷൻ കേന്ദ്രം എന്നിവയാണ്​ പദ്ധതിയിൽ വിഭാവനം ചെയ്​തത്​. എൻട്രൻസ് പ്ലാസയിൽ ടൂറിസം ഇൻഫർമേഷൻ സൻെറർ, അക്വാറിയം, 200 പേർക്ക്​ ഇരിക്കാവുന്ന ഓപൺ തിയറ്റർ എന്നിവ ആരംഭിക്കുമെന്ന് പ്രഖ്യാപിച്ചിരുന്നു. ഇതിൽ ഒാപൺ തിയറ്റർ മാത്രമാണ് ഒരുക്കാനായത്. 200 പേർക്ക്​ യോഗം ചേരാനുള്ള സൗകര്യമുണ്ടെങ്കിലും വാടകക്ക് നൽകാനായിട്ടില്ല. ഡാമിന് സമീപം ബോട്ട്ജെട്ടി നിർമിച്ചെങ്കിലും കൊതുമ്പുവള്ളംപോലും ഇറക്കാനായില്ല. ഇവിടം നാട്ടുകാർ അലക്കാനും കുളിക്കാനും കടവായി ഉപയോഗിക്കുകയാണ്. -------- പ്രതീക്ഷ കേന്ദ്രപദ്ധതിയിൽ കോവിഡ് പ്രതിസന്ധിമൂലമുള്ള സാമ്പത്തിക മാന്ദ്യത്തിൽ സർക്കാറിന് മലങ്കരയിൽ കോടികളുടെ നിക്ഷേപം നടത്താനാകുമോയെന്ന്​ സ​ംശയമാണ്​. എന്നാൽ, പി.ജെ. ജോസഫ് എം.എൽ.എ മുൻകൈയെടുത്ത് തയാറാക്കിയ ജില്ലയിലെ 182 കോടിയുടെ ടൂറിസം പദ്ധതികൾ സംസ്ഥാന സർക്കാർ കേന്ദ്രസർക്കാറിന്​ സമർപ്പിച്ചതോടെ മലങ്കര ടൂറിസം പദ്ധതിക്ക്​ ചിറക് മുളക്കുമെന്നാണ്​ പ്രതീക്ഷ. സീ എർത്ത് എന്ന സ്വകാര്യ കമ്പനിയുടെ പഠനത്തിൽ മലങ്കര പദ്ധതി പൂർണസജ്ജമാക്കാൻ 102 കോടി വേണ്ടിവരുമെന്നാണ്​ കണ്ടെത്തൽ. ------- വരുമാനം നിലച്ചു കോവിഡ് വ്യാപനം രൂക്ഷമായതോടെ മലങ്കര ടൂറിസം കേന്ദ്രവും അടക്കേണ്ടിവന്നു. ഇതോടെ ഇവിടെനിന്നുള്ള വരുമാനം പൂർണമായും നിലച്ചു. കുട്ടികളുടെ ചെറിയ പാർക്കും ഡാമി​ൻെറയും ജലാശയത്തി​ൻെറയും ഭംഗി ആസ്വദിച്ച് നടക്കാനുള്ള വാക്​വേയും മാത്രമാണ് ഉള്ളതെങ്കിലും നൂറ​ുകണക്കിന് സഞ്ചാരികളാണ് ഇവിടെ വന്നുപോയിരുന്നത്. ഇതുവഴി മാസംതോറും ലക്ഷക്കണക്കിന് രൂപയുടെ വരുമാനം ലഭിച്ചിരുന്നു. കോവിഡ് പ്രതിസന്ധി മാറി കേന്ദ്രം തുറക്കണമെങ്കിൽ ലക്ഷങ്ങൾ ചെലവഴിക്കേണ്ടതായും വരും. ------------ ചിത്രം TDL102 Malankara മലങ്കര ടൂറിസം പദ്ധതി പ്രദേശം