കരകയറാനാകാതെ സുഗന്ധവ്യഞ്​ജന വ്യാപാരമേഖല

കട്ടപ്പന: കോവിഡും ലോക്​ഡൗണും സൃഷ്​ടിച്ച കടുത്ത പ്രതിസന്ധിയിൽനിന്ന്​ കരകയറാനാകാതെ ഹൈറേഞ്ചിലെ മലഞ്ചരക്ക്​ വ്യാപാരമേഖല. സുഗന്ധവ്യഞ്​ജന, മലഞ്ചരക്ക് വ്യാപാരം മുഖ്യതൊഴിലായ 200ലധികം വ്യാപാരികളാണ് കട്ടപ്പനയിൽ മാത്രമുള്ളത്. അടച്ചിടൽ തുടങ്ങിയതോടെ ഈ വ്യാപാര സ്ഥാപങ്ങളുമായി ബന്ധപ്പെട്ട് ഉപജീവനം നടത്തിയിരുന്ന കച്ചവടക്കാരും തൊഴിലാളികളും പട്ടിണിയിലായി. സുഗന്ധ വ്യഞ്​ജനങ്ങളുടെ വിപണനകേന്ദ്രമായ കട്ടപ്പനയിലെത്തുന്ന എല്ലാ സഞ്ചാരികളുടെയും ആദ്യ മോഹം ഏലവും കുരുമുളകും ഗ്രാമ്പൂവും കറുവപ്പട്ടയുമെല്ലാം വാങ്ങുകയാണ്​. എന്നാൽ, അഞ്ചുരുളിയിലും അയ്യപ്പൻകോവിലിലുമൊന്നും സഞ്ചാരികൾ എത്താതായതോടെ വ്യാപാരം പൂർണമായി നിലച്ചു. വല്ലപ്പോഴും എത്തിനോക്കുന്ന നാട്ടുകാരും മീൻപിടിത്തക്കാരും മാത്രമാണ് ഇവിടെ ഇപ്പോൾ അവശേഷിക്കുന്നത്. സഞ്ചാരികളുടെ ഒഴുക്ക് നിലച്ചപ്പോൾ പട്ടിണിയിലായത് സഞ്ചരികളെ മാത്രം ആശ്രയിച്ച്​ വ്യാപാരം ചെയ്തിരുന്ന വഴിവാണിഭക്കാരും പെട്ടിക്കടക്കാരുമാണ്. അഞ്ചുരുളിയുമായി ബന്ധപ്പെട്ട്​ പ്രവർത്തിച്ചിരുന്ന റിസോർട്ടുകളും ഹോം സ്​റ്റേകളും ആളൊഴിഞ്ഞ നിലയിലാണ്. ഏറെ സഞ്ചാരികളെ ആകർഷിച്ചിരുന്ന അയ്യപ്പൻകോവിൽ തൂക്കുപാലത്തിൽ ഇപ്പോൾ നാട്ടുകാരെ മാത്രമേ കാണാനാകൂ. പ്രതിദിനം നൂറുകണക്കിന് സഞ്ചാരികൾ എത്തിയിരുന്ന കല്യാണത്തണ്ടും വിജനമാണ്. ഇവിടവുമായി ബന്ധപ്പെട്ട്​ ഉപജീവനം നടത്തിയിരുന്ന കച്ചവടക്കാരും കാൽവരി മൗണ്ടിലെ റിസോർട്ടുകളം വൻ പ്രതിസന്ധിയിലൂടെയാണ്​ കടന്നുപോകുന്നത്​.