തയ്യൽ തൊഴിലാളി കുടുംബങ്ങൾ പട്ടിണിയിലേക്ക്

കട്ടപ്പന: ലോക്​ഡൗൺ പ്രതിസന്ധിയിൽ ജില്ലയിലെ തയ്യൽ തൊഴിലാളികൾ പട്ടിണിയിലേക്ക്​. ഇൗ സാഹചര്യത്തിൽ ആഴ്ചയില്‍ രണ്ടുദിവസമെങ്കിലും കടകള്‍ തുറക്കാൻ അനുമതി നല്‍കണമെന്ന ആവശ്യം ശക്തമായി. ഭൂരിഭാഗം തയ്യൽ തൊഴിലാളി കുടുംബങ്ങളുടെയും വരുമാനം പൂർണമായി നിലച്ചു. തൊഴില്‍ ലഭിച്ചിരുന്ന സ്കൂള്‍ സീസണ്‍, ക്രിസ്മസ്, ഓണം, പെരുന്നാള്‍ ഉള്‍പ്പെടെ എല്ലാ സീസണുകളിലും സ്ഥാപനങ്ങള്‍ അടഞ്ഞുകിടക്കുകയായിരുന്നു. ഇതോടെ വായ്​പയെടുത്തും മറ്റും സ്ഥാപനം തുടങ്ങിയ വ്യക്തികളും കൂട്ടായ്​മകളും കടക്കെണിയിലായി. നേരത്ത ഉപഭോക്താക്കൾ നൽകിയ തുണികള്‍പോലും തുന്നി തിരികെ നൽകി ഉപജീവന മാര്‍ഗം കണ്ടെത്താന്‍ തൊഴിലാളികള്‍ക്ക് കഴിഞ്ഞില്ല. ഇവയെല്ലാം തൊഴില്‍ സ്ഥാപനങ്ങളില്‍ പൊടിയടിച്ച് നശിക്കുന്ന അവസ്ഥയിലാണ്​. അതിനാല്‍ ഇത്തരത്തില്‍ തൊഴില്‍ ചെയ്ത് തുന്നി​െവച്ച വസ്ത്രങ്ങള്‍ തിരികെ നൽകി വരുമാനമാര്‍ഗം കണ്ടെത്തുവാന്‍ ആഴ്ചയില്‍ രണ്ടുദിവസമെങ്കിലും കടകള്‍ തുറക്കാൻ അനുമതി നല്‍കണമെന്ന്​ എ.കെ.ടി.എ ജില്ല കമ്മിറ്റി കലക്ടർക്ക് നൽകിയ നിവേദനത്തിൽ ആവശ്യപ്പെട്ടു. എല്ലാ മേഖലകള്‍ക്കും ഇളവുകള്‍ നല്‍കിയ സര്‍ക്കാര്‍ തയ്യല്‍ തൊഴിലാളികളെ അവഗണിച്ചെന്നും പരാതിയുണ്ട്​. താരതമ്യേന ജനസമ്പര്‍ക്കം കൂടുതലുണ്ടാക്കുന്ന വന്‍കിട വസ്ത്രവ്യാപാര സ്ഥാപനങ്ങള്‍ക്ക് തുറക്കാന്‍ അനുമതി നല്‍കിയപ്പോള്‍ ഒന്നോ രണ്ടോ പേര്‍ തൊഴിലെടുക്കുന്ന ജനസമ്പര്‍ക്കം വളരെ കുറവായ തയ്യല്‍ സ്ഥാപനങ്ങളെ അവഗണിച്ചത് വിവേചനമാണെന്ന്​ തൊഴിലാളികൾ ചൂണ്ടിക്കാട്ടുന്നു. ജൂണ്‍ 11ന്​ കൂടുതല്‍ ഇളവുകള്‍ നല്‍കിയത് പ്രകാരം സ്ഥാപനങ്ങള്‍ എല്ലാം തുറക്കാനുള്ള അനുമതി നല്‍കിയപ്പോഴും തുറക്കാവുന്ന സ്ഥാപനങ്ങളുടെ പട്ടികയില്‍ തയ്യല്‍ കടകൾ ഇല്ല. തയ്യൽ തൊഴിലാളികളോടുള്ള അവഗണന അവസാനിപ്പിച്ച്​ കടകൾ തുറക്കാൻ അനുമതി നൽകണമെന്ന് എ.കെ.ടി.എ ജില്ല ജനറല്‍ സെക്രട്ടറി എൻ.സി. ബാബു ആവശ്യപ്പെട്ടു.