സത്യപ്രതിജ്ഞ ആഘോഷം വ്യത്യസ്​തമാക്കി പ്രവർത്തകർ

മരച്ചീനി വിളവെടുത്ത്​ കോവിഡ് രോഗികളുടെ കുടുംബങ്ങളിലെത്തിച്ച​ു നെടുങ്കണ്ടം: രണ്ടാം പിണറായി സര്‍ക്കാറിൻെറ സത്യപ്രതിജ്ഞ വ്യത്യസ്ത ആഘോഷമാക്കി പാര്‍ട്ടി പ്രവര്‍ത്തകര്‍. സുഭിക്ഷ കേരളം പദ്ധതിയിലൂടെ കഴിഞ്ഞ സര്‍ക്കാറി​ൻെറ കാലത്ത് നടത്തിയ മരച്ചീനി കൃഷി വിളവെടുത്ത്​ കോവിഡ് രോഗികളുടെ കുടുംബങ്ങളിലെത്തിച്ചാണ് ഇവര്‍ സന്തോഷം പങ്കുവെച്ചത്. ജില്ലയിലെ ഏറ്റവും വലിയ ഭൂരിപക്ഷത്തില്‍ വിജയിച്ച എം.എം. മണിയുടെ മണ്ഡലമായ ഉടുമ്പന്‍ചോലയുടെ ആസ്ഥാനമായ നെടുങ്കണ്ടത്ത്്് സത്യപ്രതിജ്ഞ ദിനം ആഘോഷമാക്കാന്‍ പ്രവര്‍ത്തകര്‍ മുന്‍കൂട്ടി തീരുമാനിച്ചിരുന്നു. എന്നാല്‍, ഇവിടം കണ്ടെയ്​ൻമൻെറ്​ സോണായി മാറിയതോടെയാണ് ആഘോഷം വ്യത്യസ്​തമാക്കാൻ തീരുമാനിച്ചത്. ഒരേക്കറിൽനിന്ന്​ 10 ക്വിൻറലിൽ അധികം മരച്ചീനി വിളവെടുത്തു. ഇത് പൂര്‍ണമായും മേഖലയിലെ കോവിഡ് ബാധിതരായ കുടുംബങ്ങള്‍ക്ക് കിറ്റുകളാക്കി നല്‍കി. മരച്ചീനിക്ക് പുറമേ പലവ്യഞ്ജനങ്ങളും പച്ചക്കറികളും അടങ്ങിയ കിറ്റുകളും വീടുകളില്‍ എത്തിച്ചു.