മെഡിക്കൽ കോളജിൽ ഓക്സിജൻ ജനറേറ്റർ; നിർമാണജോലി ആരംഭിച്ചു

ചെറുതോണി: ഇടുക്കി മെഡിക്കൽ കോളജ്​ ആശുപത്രിയിൽ ഓക്സിജൻ ജനറേറ്റർ സ്ഥാപിക്കുന്നതിനുള്ള നിർമാണജോലി ആരംഭിച്ചു. അന്തരീക്ഷത്തിൽനിന്ന് നൈട്രജൻ ഒഴിവാക്കി ഓക്സിജൻ വേർതിരിച്ചെടുക്കുന്ന ജനറേറ്റർ തിങ്കളാഴ്ചയാണ് എത്തിയത്. ഒരു മിനിറ്റിൽ 200 ലിറ്റർ ഓക്സിജൻ ഉൽപാദിപ്പിക്കാൻ ശേഷിയുള്ളതാണ് ജനറേറ്റർ. ഇത്​ സ്ഥാപിക്കുന്നതോടെ പ്രതിദിനം നാല്​ സിലിണ്ടറുകളിൽ നിറക്കാവുന്ന ഓക്സിജൻ ഉൽപാദിപ്പിക്കാം. അന്തരീക്ഷവായുവിൽനിന്ന്​ വേർതിരിച്ചെടുക്കുന്ന ഓക്സിജൻ പൈപ്പിലൂടെ ആശുപത്രിയിലെ വിവിധ ഭാഗങ്ങളിലേക്കെത്തിച്ചുനൽകാൻ ലക്ഷ്യമിട്ടുള്ളതാണ്​ പദ്ധതി. വൈദ്യുതി വകുപ്പി​ൻെറ സാമൂഹിക പ്രതിബദ്ധത ഫണ്ടിൽനിന്ന്​ മന്ത്രി എം.എം. മണി മെഡിക്കൽ കോളജിന്​ അനുവദിച്ച 50 ലക്ഷം രൂപ ചെലവിട്ടാണ്​ ജനറേറ്റർ സ്ഥാപിക്കുന്നത്. ഇടുക്കി മെഡിക്കൽ കോളജിന് ശരാശരി 100 സിലിണ്ടർ ഓക്സിജനാണ് വേണ്ടത്. ഇപ്പോൾ എറണാകുളത്തുനിന്നുമാണ് ഓക്സിജൻ കൊണ്ടുവരുന്നത്.