പ്രളയത്തില്‍ തകര്‍ന്ന റോഡിന്​ നാട്ടുകാര്‍ സംഘടിക്കുന്നു

അടിമാലി: പ്രളയത്തിൽ തകര്‍ന്ന പെരുമന്‍കുത്ത് -ആറാം മൈല്‍ റോഡ് വേഗത്തില്‍ പുനര്‍നിർമിക്കണമെന്ന ആവശ്യവുമായി പ്രദേശവാസികള്‍. കനത്ത മഴയില്‍ പുഴയിലെ നീരൊഴുക്ക് വർധിച്ചതോടെ രണ്ടിടത്താണ് റോഡ് ഒലിച്ചുപോയത്. താൽക്കാലിക സംവിധാനത്തില്‍ റോഡില്‍ ഗതാഗതം പുനഃസ്ഥാപിച്ചെങ്കിലും യാത്രക്കാര്‍ സാഹസികമായാണ് ക​ടന്നുപോകുന്നത്. വലിയ കുഴികൾ നിറഞ്ഞതാണ്​ റോഡ്​. മാങ്കുളം പഞ്ചായത്തിലെ ചിക്കണംകുടി ഉള്‍പ്പെടെ ആദിവാസി മേഖലകളിലേക്കുള്ള പാതകൂടിയാണ് ഇത്. റീബില്‍ഡ് കേരളയില്‍ ഉള്‍പ്പെടുത്തി റോഡിന് 12.5 കോടി അനുവദിച്ചിട്ടുണ്ടെന്ന്​ ജനപ്രതിനിധികള്‍ പറയുന്നുണ്ടെങ്കിലും നിര്‍മാണം തുടങ്ങിയിട്ടില്ല. മഴക്കാലത്തിന്​ മുമ്പ്​ റോഡ് നിര്‍മാണം പൂര്‍ത്തിയാക്കണമെങ്കില്‍ ഇപ്പോഴേ ജോലികള്‍ ആരംഭിക്കണം. റോഡ് നിര്‍മാണം ഇനിയും വൈകിയാൽ സമരം ആരംഭിക്കുമെന്ന്​ പ്രദേശവാസികള്‍ പറഞ്ഞു. ചിത്രം: തകര്‍ന്നുകിടക്കുന്ന പെരുമന്‍കുത്ത് ആറാംമൈല്‍ റോഡ്