ഡിസ്പെൻസറികൾതോറും പഞ്ചകർമ ഒ.പി വേണം: ശിൽപശാല

തൊടുപുഴ: എല്ലാ ആയുർവേദ ഡിസ്പെൻസറികളിലും ഒ.പി പഞ്ചകർമവിഭാഗം ആരംഭിക്കണമെന്ന് ആയുർവിഷൻ ശിൽപശാല. ഗവ. ആയുർവേദ മെഡിക്കൽ ഓഫിസേഴ്​സ്​ അസോസിയേഷൻ സംസ്ഥാനതലത്തിൽ സംഘടിപ്പിച്ച ജനകീയാസൂത്രണ പദ്ധതികളുടെ ശിൽപശാലയിലായിരുന്നു ആവശ്യമുയർന്നത്. ജനകീയാസൂത്രണത്തി​ൻെറ 25ാം വർഷത്തിൽ ആയുർവേദ പദ്ധതികൾ കാലാനുസൃത തിരുത്തലുകൾക്ക് വിധേയമാക്കുക, പദ്ധതി നടത്തിപ്പ് കാര്യക്ഷമമാകാൻ നിർവഹണ ഉദ്യോഗസ്ഥരുള്ള സ്ഥിരം ഡിസ്പെൻസറികൾ പഞ്ചായത്തുകളിൽ ആരംഭിക്കുക, ഇ. ഡിസ്പെൻസറികൾ ആരംഭിക്കുക തുടങ്ങിയ ആവശ്യങ്ങളും ഉയർന്നു. ഓൺലൈൻ പ്ലാറ്റ്ഫോമിൽ നടന്ന പരിപാടി കില ഡയറക്​ടർ ജനറൽ ഡോ. ജോയ് ഇളമൺ ഉദ്ഘാടനം ചെയ്തു. അസോസിയേഷൻ സംസ്ഥാന പ്രസിഡൻറ്​ ഡോ. ആർ. കൃഷ്ണകുമാർ അധ്യക്ഷത വഹിച്ചു. രക്ഷാധികാരി ഡോ. ഷർമദ് ഖാൻ, വൈസ് പ്രസിഡൻറ്​ ഡോ. എൻ. രാജേഷ് എന്നിവർ വിഷയാവതരണം നടത്തി. ആയുർവേദ പൊതുജനാരോഗ്യ വിദഗ്​ധരായ ഡോ. വി.ജി. ഉദയകുമാർ, ഡോ. എ.പി. ശ്രീകുമാർ എന്നിവർ മോഡറേറ്ററായിരുന്നു. -------------------- കാട്ടുപോത്ത് ചത്തു മറയൂര്‍: മറയൂര്‍ ചിന്നവരയിലെ പാറക്കെട്ടിൽ ഉരുണ്ട് കാട്ടുപോത്ത് ചത്തു. തിങ്കളാഴ്​ച രാവിലെ വനപാലകരുടെ പട്രോളിങ്ങിനിടെയാണ് കാട്ടുപോത്തിനെ ചത്തനിലയില്‍ കണ്ടത്. ആറു വയസ്സുള്ള കാട്ടുപോത്താണ് ചത്തത്. വൈകീട്ടോടെ പോസ്​റ്റ്​മോർട്ടം നടത്തി മറവ് ചെയ്​തു.