നേര്യമംഗലം പാലത്തിലെ സിഗ്​നല്‍ ലൈറ്റുകള്‍ കണ്ണടച്ചു

അടിമാലി: നേര്യമംഗലം ആര്‍ച് പാലത്തി​ൻെറ ഇരുവശത്തും സ്ഥാപിച്ച ട്രാഫിക് സിഗ്​നല്‍ ലൈറ്റുകളുടെ പ്രവര്‍ത്തനം നിലച്ചു. സോളാര്‍ പാനലി​ൻെറ സഹായത്തോടെ പ്രവര്‍ത്തിച്ചിരുന്ന ലൈറ്റുകൾ അറ്റകുറ്റപ്പണിയോ സംരക്ഷണമോ ഇല്ലാതെ വന്നതോടെയാണ് പ്രവർത്തനരഹിതമായത്​. എറണാകുളം-ഇടുക്കി ജില്ലകളെ ബന്ധിപ്പിക്കുന്നതും പെരിയാറിന്​ കുറുകെ നീളം കൂടിയതും സമുദ്രനിരപ്പില്‍നിന്ന് 300 അടി ഉയരത്തിലുള്ളതുമാണ് നേര്യമംഗലം ആര്‍ച് പാലം.1940ൽ​ രാജഭരണകാലത്ത് നിര്‍മിച്ചതാണ് പാലം. ഒരുവാഹനത്തിന് മാത്രം കടന്നുപോകാന്‍ സൗകര്യമുള്ള ഇതില്‍ ഇരുഭാഗത്തുനിന്നും വാഹനങ്ങള്‍ കയറുന്നത് ഗതാഗത തടസ്സത്തിനും അപകടങ്ങള്‍ക്കും കാരണമായതോടെയാണ്​ ഇരുവശത്തും സിഗ്​നല്‍ ലൈറ്റുകള്‍ സ്ഥാപിച്ചത്. ഏതാനും മാസം മാത്രമാണ് ഇവിടെ ലൈറ്റുകള്‍ കൃത്യമായി പ്രവര്‍ത്തിച്ചത്. ഇപ്പോള്‍ പൂര്‍ണമായി പ്രവര്‍ത്തനരഹിതമാണ്​. എറണാകുളം-ഇടുക്കി ജില്ലകളുടെ അതിര്‍ത്തിയായതിനാല്‍ ഒരുഭാഗം ഊന്നുകല്‍ ​െപാലീസും മറുഭാഗം അടിമാലി പൊലീസുമാണ് നിയന്ത്രിക്കേണ്ടത്. എന്നാല്‍, പൊലീസിന് ഈ സിഗ്​നല്‍ ലൈറ്റുകള്‍ പ്രവര്‍ത്തിപ്പിക്കാന്‍ താൽപര്യമില്ലായിരുന്നു. മൂന്നാറില്‍ സഞ്ചാരികളുടെ തിരക്കേറു​േമ്പാ​െഴല്ലാം ഈ പാലത്തില്‍ ഗതാഗത തടസ്സം ഉണ്ടാകുന്നത് പതിവാണ്. നിശ്ചിതസമയം വീതം വാഹനങ്ങള്‍ നിയന്ത്രിച്ചാല്‍ ഗതാഗതപ്രശ്‌നങ്ങള്‍ പരിഹരിക്കാന്‍ കഴിയും.