മൂന്നര കിലോ കഞ്ചാവുമായി അടിമാലി സ്വദേശി പിടിയിൽ

മറയൂർ: തമിഴ്നാട്ടിൽനിന്ന് എത്തിച്ച കഞ്ചാവുമായി അടിമാലി സ്വദേശി പിടിയിൽ. അടിമാലി പൊളിഞ്ഞപാലം തണ്ടേൽ വീട്ടിൽ ഷമീറിനെയാണ്​ (27) മറയൂർ എക്സൈസ് സംഘം പിടികൂടിയത്. ബുധനാഴ്​ച രാവിലെ മറയൂർ-കാന്തല്ലൂർ റോഡിൽ സഹായഗിരിക്ക്​ സമീപത്താണ് ഇയാൾ പിടിയിലായത്. തമിഴ്നാട്ടിൽനിന്ന്​ ഒരുകിലോ കഞ്ചാവിന് 30,000 രൂപ നിരക്കിൽ വാങ്ങി അതിർത്തി ചെക്ക്പോസ്​റ്റായ ചിന്നാർ വരെ വാഹനത്തിൽ എത്തുകയും അവിടെനിന്ന്​ വനത്തിലൂടെ ചെക്ക്​​പോസ്​റ്റുകൾ മറികടന്ന്​ ശേഷം മറ്റൊരു വാഹനത്തിൽ മറയൂരിൽ എത്തുകയായിരുന്നു. ബസ് കയറുന്നതിന്​ റോഡിലൂടെ നടക്കുന്നതിനിടെയാണ്​ എക്സൈസ് റേഞ്ച് ഓഫിസർ ടി. രഞ്ജിത്ത് കുമാർ, പ്രിവൻറിവ് ഓഫിസർ കെ.പി. ബിനുമോൻ, സി.ഇ.ഒമാരായ മനു, കെ.ടി. റോയിച്ചൻ, എ.എസ്. അനീഷ്‌ എന്നിവരുടെ നേതൃത്വത്തിലെ സംഘം പിടികൂടിയത്. കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു.