മൂന്നാറിൽ ഗതാഗത പരിഷ്​കാരങ്ങൾ നടപ്പാക്കാൻ പ്രത്യേക സംഘം

മൂന്നാര്‍: മൂന്നാറിൽ ഗതാഗത പരിഷ്‌കാരങ്ങള്‍ നടപ്പാക്കാന്‍ പ്രത്യേക സംഘത്തെ നിയോഗിച്ചു. സന്ദര്‍ശകരുടെ തിരക്കേറിയതോടെ ഗതാഗത ക്കുരുക്ക് പതിവായ സാഹചര്യത്തിലാണിത്​. അവധി ദിവസങ്ങളില്‍ നിയന്ത്രണാതീതമായി സന്ദര്‍ശകരെത്തുന്ന മാട്ടുപ്പെട്ടി, മൂന്നാര്‍ ടൗണ്‍, രാജമല എന്നിവിടങ്ങളില്‍ ഗതാഗതക്കുരുക്ക്​ പതിവാണ്​. ഇത്തരം സന്ദര്‍ഭങ്ങളില്‍ വലിയവാഹനങ്ങള്‍ പഴയമൂന്നാറിലെ പഞ്ചായത്ത് പാര്‍ക്കിങ് ഗ്രൗണ്ടില്‍ നിര്‍ത്തണമെന്ന വ്യവസ്ഥയും നടപ്പാകുന്നില്ല. വഴിയോരങ്ങളില്‍ അലക്ഷ്യമായി വാഹനങ്ങള്‍ നിര്‍ത്തിയിടുന്നതിനാൽ മറ്റ് വാഹനങ്ങള്‍ക്ക് കടന്നുേപാകാന്‍ കഴിയുന്നില്ല. ഇത്തരം പ്രശ്‌നങ്ങള്‍ക്ക് പരിഹാരം കാണുകയാണ്​ ലക്ഷ്യം. പഞ്ചായത്ത് -പൊലീസ്​ ഉദ്യോഗസ്ഥര്‍ അടങ്ങുന്ന സംഘം വാഹനങ്ങള്‍ പാര്‍ക്ക് ചെയ്യുന്നത് സംബന്ധിച്ച് മൂന്നാറിലെത്തുന്നവര്‍ക്ക് നിർദേശങ്ങള്‍ നല്‍കും. വിവിധ മേഖലകളില്‍ സൈന്‍ ബോര്‍ഡുകളും സ്ഥാപിക്കും. ഇരുചക്രവാഹനങ്ങള്‍ ടൗണില്‍ പാര്‍ക്ക് ചെയ്യാന്‍ അനുവദിക്കാതെ പ്രത്യേക സംവിധാനമൊരുക്കും. പഴയമൂന്നാറിലെ പ്രൈവറ്റ് ബസ് സ്​റ്റാൻഡ്​​ അടിയന്തരമായി തുറന്നുകൊടുക്കുന്നതിനും നടപടി സ്വീകരിക്കും. അടുത്ത ദിവസം വിവിധ രാഷ്​ട്രീയ പ്രവര്‍ത്തകരുമായി ചര്‍ച്ചകള്‍ നടത്താനും ദേവികുളം സബ്​കലക്​ടറുടെ നേതൃത്വത്തിൽ തീരുമാനമെടുത്തിട്ടുണ്ട്.