സംസ്ഥാന പാതക്ക്​ കുറുകെ വറ്റാൻ മടിച്ച്​ വെള്ളക്കെട്ട്​; കുണ്ടുംകുഴിയും അപകടക്കെണി

കാഞ്ഞാർ: സംസ്ഥാന പാതക്ക്​ കുറുകെ സ്ഥിരം നീരൊഴുക്കുള്ള ഭാഗം. തൊടുപുഴ-പുളിയന്മല റോഡിൽ കാഞ്ഞാറിൽ വാഗമൺ കവലയിലെ ചപ്പാത്താണ്​ ഈ 'അനൗ​ദ്യോഗിക ചപ്പാത്ത്​'. എത്ര കോൺക്രീറ്റ് ചെയ്​താലും ടാർ ചെയ്​താലും ആഴ്​ചകൾക്കകം വീണ്ടും പൊളിയും. മഴ പെയ്യുമ്പോൾ ചപ്പാത്ത്​ കവിഞ്ഞ്​ വെള്ളം ഒഴുകും. വർഷത്തിൽ ആറുമാസം ഇവിടെ മുട്ടൊപ്പം വെള്ളമാണ്. മഴയെത്തിയാൽ ഇവിടെ വെള്ളപ്പൊക്കംതന്നെ. ഇതിനുപുറമെയാണ്​ റോഡിന്​ മുകളിൽനിന്ന്​ ഒഴുകിയിരുന്ന തോട്​ വഴിതിരിച്ചു വിട്ടതിനാൽ അധികജലം റോഡിന്​ കുറുകെ ഒഴുകുന്ന സ്ഥിതി. സമീപത്തെ കമ്പനിയിൽനിന്ന്​ ജലം ഒഴുകിയെത്തുന്നതും ഇതിലൂടെ. ഇടക്ക്​ പൈപ്പുപൊട്ടിയും ജലം റോഡിലൂടെ ഒഴുകും. ചപ്പാത്തിലെ കുഴി ശ്രദ്ധയിൽപെടാതെ ദിനേന ഒട്ടേറെ ഇരുചക്രവാഹനങ്ങൾ അപകടത്തിൽ പെടുന്നത്​ പതിവാണ്. വാഗമൺ കാണാൻ എത്തുന്ന ഒട്ടേറെ ആളുകൾ ഇവിടെ കുഴിയിൽ വീണ് അപകടത്തിൽ പെടാറുണ്ട്​. മഴക്കാലത്ത് ഇരുചക്രവാഹനങ്ങളുടെ ചപ്പാത്തു കടന്നുള്ള യാത്ര ഏറെ ബുദ്ധിമുട്ടാണ്. പ്രതിദിനം നൂറുകണക്കിന്​ വാഹനങ്ങളാണ് ഇതുവഴി കടന്നുപോകുന്നത്. ചപ്പാത്ത് മാറ്റി ഇവിടെ കലുങ്ക് നിർമിക്കണമെന്ന ആവശ്യം അധികൃതർ ചെവിക്കൊണ്ടിട്ടില്ല. ഇതിലെ വാഹനങ്ങൾ കടന്നുപോകുമ്പോൾ ചളിവെള്ളം തെറിക്കുന്നതും പതിവാണ്​. ഇരുചക്രവാഹനത്തിൽ കടന്നുപോകുന്നവരും ഇവിടെ ചളിയിൽ കുളിച്ചാണ് യാത്ര. റോഡിലേക്കുകയറുന്ന സ്ഥലത്ത് അടിക്കടിയുണ്ടാകുന്ന ഗട്ടറുകളും അപകട കാരണമാകാറുണ്ട്​. കുഴികൾ അടക്കാമെന്നുവെച്ചാൽ ഏതാനും ആഴ്​ചകൾക്കകം വീണ്ടും കുഴി പ്രത്യക്ഷപ്പെടും. സഞ്ചാരികളായ ഒട്ടേറെ ഇരുചക്രവാഹന യാത്രക്കാർ ഇവിടെ അപകടത്തിൽപെടാറുണ്ട്​. ഒട്ടേറെ വാഹനങ്ങൾ കടന്നുപോകുന്ന ഇവിടെ കലുങ്ക് നിർമിച്ച് അപകട സ്ഥിതി ഒഴിവാക്കണമെന്നാണ്​ നാട്ടുകാരുടെ ആവശ്യം. തിരക്കുള്ള റൂട്ടിലെ ഈ അപകടക്കെണിക്ക്​ പരിഹാരമില്ലെങ്കിൽ ദുരന്തസാധ്യത ഏറെയാണ്​. ക്യു ആർ കോഡ്​ 'ആപ്പാ'കുമോ? ടൂറിസ്​റ്റ്​ ഗൈഡുകൾക്ക്​ ആശങ്ക മൂന്നാര്‍: മൂന്നാറിലേക്ക് വിനോദസഞ്ചാരികളെ ആകര്‍ഷിക്കാന്‍ ക്യു ആര്‍ കോഡ് ആപ്പുമായി സബ്​കലക്​ടറും കൂട്ടരും രംഗത്തെത്തിയതോടെ തങ്ങളുടെ തൊഴില്‍ നഷ്​ടപ്പെടുമോയെന്ന ആശങ്കയിലാണ് മൂന്നാറില്‍ ഗൈഡായി തൊഴിലെടുക്കുന്ന വിഭാഗം. ആശങ്കകള്‍ പരിഹരിക്കണമെന്ന് ആവശ്യപ്പെട്ട് വിവിധ രാഷ്​ട്രിയപാര്‍ട്ടികള്‍ക്ക് ഈ വിഭാഗം നിവേദനം നല്‍കി. മൂന്നാറിലെ ടൂറിസം കേന്ദ്രങ്ങളിലേക്കെത്തുന്ന സഞ്ചാരികളെ ആകര്‍ഷിക്കാന്‍ സബ്​കലക്​ടറുടെ നേതൃത്വത്തിൽ ക്യു ആര്‍ കോഡ് ആപ്പുമായി മുന്നോട്ട് പോകുന്ന സാഹചര്യത്തിലാണ് വര്‍ഷങ്ങളായി മൂന്നാറിലും പരിസരപ്രദേശങ്ങളിലും ഗൈഡുമാരായി തൊഴിലെടുക്കുന്നവർ ആശങ്കയിലായത്​. മുന്നൂറോളം ഗൈഡുമാരാണ് മൂന്നാറി​ൻെറ വിനോദസഞ്ചാരികളെ ആശ്രയിച്ച് തൊഴിലെടുക്കുന്നത്. സര്‍ക്കാറി​ൻെറ അംഗീകൃത ഐ.ഡി കാര്‍ഡുകളും കൈവശമുണ്ടെന്ന് ഇവര്‍ പറയുന്നു. മൂന്നാറിലെ പ്രധാന വിനോദ സഞ്ചാരകേന്ദ്രങ്ങളിലേക്കുള്ള വഴിയും മറ്റ് പ്രാഥമികവിവരങ്ങളും നല്‍കാന്‍ സാധിക്കുന്ന വൈബ്‌സൈറ്റ് നിര്‍മിക്കുകയും ഈ വെബ്‌സൈറ്റിലേക്ക് നയിക്കുന്ന ക്യു ആര്‍ കോഡ് സ്​റ്റിക്കറുകള്‍ പൊതുയിടങ്ങളിലും വാഹനങ്ങളിലും ഹോട്ടലുകളിലും പതിക്കുകയും ചെയ്യുന്നതാണ് പുതിയ പദ്ധതി.