ദേവികുളം മേഖലയില്‍ പട്ടയമില്ല; ആക്​ഷൻ കൗൺസിൽ നിവേദനം നൽകി

മൂന്നാര്‍: ദേവികുളം മേഖലയില്‍ പട്ടയപ്രശ്‌നം വീണ്ടും രൂക്ഷമാകുന്നു. പ്രശ്‌നങ്ങള്‍ക്ക് പരിഹാരം കണ്ടെത്താന്‍ ദേവികുളം ലാൻഡ്​​ ആക്​ഷന്‍ കൗൺസിലിന് നാട്ടുകാര്‍ രൂപംനല്‍കി. ദേവികുളം നിവാസികള്‍ക്ക് പട്ടയം കിട്ടാക്കനിയായതോടെയാണ് ലാൻഡ്​​ ആക്​ഷന്‍ കൗൺസിലി​ൻെറ നേതൃത്വത്തില്‍ പ്രക്ഷോഭങ്ങള്‍ സംഘടിപ്പിക്കാന്‍ തീരുമാനിച്ചത്​. '99 മുതല്‍ ദേവികുളം കോളനിയില്‍ താമസിക്കുന്ന ആയിരക്കണക്കിന് സാധാരണക്കാരുടെ പട്ടയ നടപടികള്‍ റവന്യൂ വകുപ്പ് പരിഗണിച്ചെങ്കിലും തുടര്‍നടപടിയില്ല. കെ.ഡി.എച്ച് ആക്ടിലെ ചില നിർദേശങ്ങളില്‍ സര്‍ക്കാര്‍ തീരുമാനം വൈകുന്നതാണ് തടസ്സമായുള്ളത്. പഞ്ചായത്തി​ൻെറ നേതൃത്വത്തില്‍ ലൈഫ് പദ്ധതി ആവിഷ്‌കരിച്ചതും കൈവശ രേഖ കിട്ടാക്കനിയായതോടെ പ്രയോജനപ്പെടുന്നില്ല. നിർമാണങ്ങള്‍ക്കായുള്ള അനുമതിയും പ്രദേശത്ത് നിലച്ചു. ആക്​ഷന്‍ കൗൺസില്‍ നേതൃത്വത്തിൽ ദേവികുളം ആര്‍.ഡി.ഒ ഓഫിസിന് മുന്നില്‍ ധര്‍ണ നടന്നു. ആയിരത്തോളം പേര്‍ ഒപ്പിട്ട നിവേദനം സബ് കലക്ടര്‍ പ്രേംകൃഷ്ണന് കൈമാറി. കണ്‍വീനര്‍ ശരത് ചന്ദ്രന്‍, ചെയര്‍മാന്‍ ജെ. ബെന്നി, രക്ഷാധികാരി ബിന്‍സി റോബിന്‍സന്‍, ശ്രീമൂലം ക്ലബ്​ പ്രസിഡൻറ്​ വി.ഒ. ഷാജി, എം.വി. ശശികുമാര്‍ തുടങ്ങിയവർ സമരത്തിന്​ നേതൃത്വം നൽകി. ചിത്രം: TDL DEVIKULAM ദേവികുളം ലാൻഡ്​ ആക്​ഷന്‍ കൗൺസിലി​ൻെറ നേതൃത്വത്തില്‍ ആയിരംപേര്‍ ഒപ്പിട്ട നിവേദനം സബ് കലക്ടര്‍ പ്രേംകൃഷ്ണന് നൽകുന്നു