വിമത പിന്തുണക്കും; തൊടുപുഴ നഗരസഭ ഉറപ്പിച്ച്​ യു.ഡി.എഫ്​

* അട്ടിമറി പ്രതീക്ഷ വിടാതെ എൽ.ഡി.എഫ്​​ തൊടുപുഴ: അവസാനനിമിഷം അട്ടിമറി ഉണ്ടായില്ലെങ്കിൽ തൊടുപുഴ നഗരസഭ യു.ഡി.എഫ്​ ഭരിക്കും. മുന്നണി അടിസ്ഥാനത്തിൽ ഏറ്റവും കൂടുതൽ സീറ്റ്​ നേടിയ യു.ഡി.എഫിന്​ രണ്ട്​ കോൺഗ്രസ്​ വിമതരുടെ നിലപാട്​ നിർണായകമായിരിക്കെ അവരിൽ ഒരാളുടെ പിന്തുണ ഉറപ്പാക്കിയതോടെയാണ്​ ഭരണം ലഭിക്കുന്നതിന്​ സാധ്യത ഏറിയത്​. 35 അംഗ നഗരസഭയിൽ യു.ഡി.എഫ്​- 13, എൽ.ഡി.എഫ്​- 12, ബി.ജെ.പി-8, കോൺഗ്രസ്​ വിമതർ 2 എന്നിങ്ങനെയാണ്​ കക്ഷിനില. ബി.ജെ.പി വിട്ടുനിൽക്കുന്ന സാഹചര്യം പ്രതീക്ഷിക്കുന്ന തെരഞ്ഞെടുപ്പിൽ വിമതരുടെ നിലപാട്​ നിർണായകമായിരുന്നു. രണ്ട്​ വിമതരും ഒരുമിച്ച്​ എൽ.ഡി.എഫിനൊപ്പം നിൽക്കുന്ന സാഹചര്യമുണ്ടായാൽ നഷ്​ടപ്പെടുമായിരുന്ന ഭരണമാണ് കോൺഗ്രസ്​ മുനിസിപ്പൽ മണ്ഡലം പ്രസിഡൻറ്​ ഷാജഹാ​ൻെറ നോമിനിയായ വിമത, നിസ സക്കീർ അനുകൂല നിലപാടിലായതോടെ യു.ഡി.എഫ്​ ഉറപ്പിച്ചത്​. ഭരണം മാറ്റിമറിക്കാനാകാത്ത സാഹചര്യത്തിൽ 12ാം വാര്‍ഡില്‍നിന്ന്​ വിജയിച്ച കോൺഗ്രസ്​ വിമതൻ സനീഷ് ജോര്‍ജും യു.ഡി.എഫുമായി ധാരണയായതായി സൂചനയുണ്ട്​. 12ാം വാർഡ്​ വിമതനെയും യു.ഡി.എഫിൽനിന്ന്​ മറ്റാരെയെങ്കിലും അടർത്തിയെടുത്ത്​ അവസാനവട്ട കളികൾ അണിയറയിൽ സജീവമായിരിക്കെ അട്ടിമറി സാധ്യത തള്ളാനും കഴിയില്ലെന്ന സ്ഥിതിയുണ്ട്​. യു.ഡി.എഫിൽനിന്ന്​ ആരെ​യെങ്കിലും കൂടി മറുപക്ഷത്തെത്തിച്ച്​ 12ാം വാർഡ്​ വിമത​ൻെറ സഹായത്തോടെ ഭരണം ഉറപ്പിക്കാൻ ഞായറാഴ്​ച വൈകിയും ഇടതു നേതൃത്വവും കോൺഗ്രസിലെ വിമത വിഭാഗവും ശ്രമം തുടരുകയാണ്​. ഇത്തവണ വിജയിച്ചുവന്ന മുൻ മുൻസിപ്പൽ വൈസ്​ ചെയർമാ​ൻെറ ഭാര്യയെയും ലീഗ്​ സീറ്റിൽ വിജയിച്ച വനിതയെയും ആണ്​ എൽ.ഡി.എഫ്​ പ്രധാനമായും ഉന്നംവെക്കുന്നത്​. മറ്റ്​ ചിലരെയും ചാക്കിലാക്കാൻ ശ്രമമുണ്ട്​. നിസ സക്കീർ ഇടത്​ വാഗ്​ദാനം തള്ളിയ സാഹചര്യത്തിലാണിത്​. യു.ഡി.എഫിൽനിന്ന്​ ഒരാളെ കിട്ടിയാൽ അവശേഷിച്ച കോൺഗ്രസ്​ വിമതനെയും കൂട്ടി വിജയിക്കാമെന്ന പ്രതീക്ഷയിലാണ്​​ എൽ.ഡി.എഫ്​ കരുനീക്കം​. ഭരണം യു.ഡി.എഫിനായാൽ മുതലിയാർമഠം വാർഡിൽ വിജയിച്ച ഷീജ ഷാഹുൽഹമീദ്​ വൈസ്​ ചെയർപേഴ്​സനായി ഒരു ടേമിലെങ്കിലും ഉണ്ടാകുമെന്നും ഉറപ്പായിട്ടുണ്ട്​. നഗരസഭ ചെയർമാൻ: ജോസഫ്​ ജോണിന്​ സാധ്യത തൊടുപുഴ: യു.ഡി.എഫിൽ കൂടുതൽ അംഗങ്ങളുള്ള മുസ്​ലീം ലീഗ്​ ചെയർമാൻ പദവിക്ക്​ അവകാശവാദവുമായി രംഗത്തുണ്ടെങ്കിലും ​സംസ്​ഥാനതല മുന്നണി ധാരണയുടെ അടിസ്ഥാനത്തിൽ കേരള കോൺഗ്രസ്​ ജോസഫ്​ വിഭാഗത്തിന്​ തൊടുപുഴ നഗരസഭ അധ്യക്ഷപദം നൽകാൻ സാധ്യത. കോൺഗ്രസിന്​ ചെയർമാൻ പദവി കിട്ടണമെന്ന ആവശ്യമുണ്ടെങ്കിലും ആദ്യ ഒരുവർഷം ജോസഫ്​ വിഭാഗത്തിലെ അഡ്വ. ജോസഫ്​ ജോൺ വരുമെന്നാണ്​ സൂചന. തുടർന്നുള്ള വർഷങ്ങളിൽ കോൺഗ്രസിനും മുസ്​ലിംലീഗിനും ചെയർമാൻ പദവി വീതിക്കും. ജോസഫി​ൻെറ തട്ടകമെന്ന നിലയിലാണ്​ ഈ ആനുകൂല്യം. ​ ഉപാധ്യക്ഷ സ്ഥാനത്തേക്ക്​ മിക്കവാറും ലീഗ്​ അംഗമാകും വരിക. ജെസി ജോണിക്കാണ്​ വൈസ്​ ചെയർപേഴ്​സൻ പദവിലേക്ക്​ കൂടിയ സാധ്യത. കോൺഗ്രസിനാണ്​ അധ്യക്ഷപദമെങ്കിൽ തൊടുപുഴ ടൗൺ സഹകരണബാങ്ക്​ പ്രസിഡൻറ്​ കെ. ദീപകിനാണ്​ സാധ്യത. ലീഗിന്​ ചെയർമാൻ പദവി ലഭിച്ചാൽ മലേപറമ്പ്​ വാർഡ്​ കൗൺസിലർ അബ്​ദുൽ കരീമാകും സ്​ഥാനത്തെത്തുക.