തദ്ദേശ സ്ഥാപനങ്ങളിലെ അധ്യക്ഷപദവി; യു.ഡി.എഫ്​ തീരുമാനം ഇന്ന്​​

തൊടുപുഴ: ജില്ലയിൽ യു.ഡി.എഫിന്​ ഭരണംലഭിക്കാൻ സാധ്യതയുള്ള തദ്ദേശ സ്ഥാപനങ്ങളിൽ അധ്യക്ഷപദവി വീതം​െവക്കുന്നത്​ സംബന്ധിച്ച്​ തീരുമാനം ഇന്ന്​. തിങ്കളാഴ്​ചയാണ്​ നഗരസഭ ചെയർമാൻ തെരഞ്ഞെടുപ്പ്​. കോൺഗ്രസ്​, കേരള കോൺഗ്രസ്​ ജോസഫ്​, മുസ്​ലിംലീഗ്​ കക്ഷിനേതാക്കൾ തമ്മിൽ ഉഭയകക്ഷി ചർച്ച വ്യാഴാഴ്​ച ആരംഭിച്ചെങ്കിലും തീരുമാനത്തിൽ എത്താനായില്ല. അവസാനവട്ട ചർച്ച ഞായറാഴ്​ച നടക്കും. ആർക്കും കേവല ഭൂരിപക്ഷമില്ലാത്ത തൊടുപുഴ നഗരസഭയിൽ രണ്ട്​ വിമതരെ ഒപ്പംനിർത്തി ഭരണം പിടിക്കാൻ കഴിയുമെന്ന പ്രതീക്ഷയിലാണ്​ യു.ഡി.എഫ്​. 35അംഗ നഗരസഭയിൽ യു.ഡി.എഫ്​ -13, എൽ.ഡി.എഫ്​ -12, ബി.ജെ.പി -എട്ട്​, സ്വതന്ത്രർ -രണ്ട്​ എന്നിങ്ങനെയാണ്​ കക്ഷിനില. ഇതിൽ കോൺഗ്രസ്​ വിമതയായി വിജയിച്ച കൗൺസിലറുടെ പിന്തുണ ഏറെക്കുറെ ഉറപ്പാക്കിയതായി ഇവർ പറയുന്നു. തനിക്കും ഒപ്പം നിന്നവർക്കും എതിരായ അച്ചടക്ക നടപടി പിൻവലിക്കുന്നത്​ അടക്കം ആവശ്യങ്ങൾ ഇവർ മുന്നോട്ടു​െവച്ചിട്ടുണ്ട്​. അ​േതസമയം, 12ാം വാർഡിൽ വിമതനായി മത്സരിച്ച്​ വിജിച്ച കോൺഗ്രസ്​ മുൻ ബൂത്ത് പ്രസിഡൻറ് നിലപാട്​ വ്യക്തമാക്കിയിട്ടില്ല. യു.ഡി.എഫിന്​ ഒരു സ്വതന്ത്ര​ൻെറ പിന്തുണ ലഭിച്ചാൽ ഭരണം ഏറെക്കുറെ ഉറപ്പിക്കാം. അതേസമയം, പുറത്തുനിന്ന്​ രണ്ടുപേരുടെ പിന്തുണ ലഭിച്ചെങ്കിലെ എൽ.ഡി.എഫിന്​ സാധ്യതയുള്ളൂ. യു.ഡി.എഫ്​ ഉഭയകക്ഷി ചർച്ചകൾക്കുശേഷം നഗരസഭയിലെ ഭരണം സംബന്ധിച്ച്​ തീരുമാനം ഉണ്ടാകുമെന്ന്​ ഡി.സി.സി പ്രസിഡൻറ്​ ഇബ്രാഹീംകുട്ടി കല്ലാർ പറഞ്ഞു. നഗരസഭയിൽ ആദ്യ ഉൗഴം ലഭിക്കാനും ചരടുവലി ശക്തമാണ്​. യു.ഡി.എഫിന്​ കേവല ഭൂരിപക്ഷമുള്ള കട്ടപ്പനയിൽ ഏറ്റവും വലിയ കക്ഷി എന്ന നിലയിൽ കോൺഗ്രസിന്​ ആദ്യ ഉൗഴം ഉറപ്പായിരിക്കെ തൊടുപുഴയിൽ ഏറ്റവും വലിയ കക്ഷിയായ മുസ്​ലിംലീഗ്​ ആദ്യവട്ടം അധ്യക്ഷസ്ഥാനം ആവശ്യപ്പെട്ടിട്ടുണ്ട്​. രണ്ട്​ അംഗങ്ങളുള്ള കേരള കോൺഗ്രസ്​ ജോസഫ്​ വിഭാഗവും ആദ്യവട്ടം വേണമെന്ന ആവശ്യവുമായി രംഗത്തുണ്ട്​. ​ അതേസമയം, എൽ.ഡി.എഫിൽ ഗ്രാമ, ബ്ലോക്ക്​ പഞ്ചായത്തുകളിലെ അധ്യക്ഷപദവി സംബന്ധിച്ച്​ തീരുമാനമായതായി ജില്ല കൺവീനർ കെ.കെ. ശിവരാമൻ പറഞ്ഞു. ഘടകകക്ഷികൾക്കെല്ലാം ഉൗഴമിട്ട്​ അധ്യക്ഷപദവി ലഭിക്കുന്ന തരത്തിലാണ്​ തീരുമാനം. ജില്ല പഞ്ചായത്ത്​ അധ്യക്ഷപദവി സംബന്ധിച്ച്​ മുന്നണി സംസ്ഥാന നേതൃത്വമാണ്​ തീരുമാനിക്കുക. ​