ക്രിസ്​മസ്​ കേക്കും ആശംസകളുമായി അധ്യാപകർ കുട്ടികളുടെ വീടുകളിൽ

നെടുങ്കണ്ടം: അധ്യാപകർ ക്രിസ്​മസ്​ കേക്കുകളും ആശംസകളുമായി വിദ്യാർഥികളുടെ ഭവനങ്ങളിലെത്തിയത് പുതുമയായി. കോവിഡ്​ വ്യാപനത്തെ തുടർന്ന് ഒമ്പത​ു​ മാസമായി വീടുകളിൽ കഴിയുന്ന വിദ്യാർഥികളെ കാണാനും ആശംസകൾ നേരാനുമാണ് രാമക്കൽമേട് സേക്രഡ് ഹാർട്ട് സ്​കൂളിലെ അധ്യാപകർ 449 കുട്ടികളുടെ വീടുകളിൽ കേക്കുകളെത്തിച്ചത്. ക്രിസ്​മസ്​-പുതുവർഷ ആശംസകൾ അറിയിച്ചാണ് സ്​കൂൾ അധികൃതർ മടങ്ങിയത്. കുടുംബത്തോടൊപ്പം കുട്ടികളെ കാണാനും വിവരങ്ങൾ കൈമാറാനും ഭവനസന്ദർശനത്തിലൂടെ കഴിഞ്ഞു. അധ്യാപകരും അനധ്യാപകരും ചേർന്നാണ് കേക്ക്​ വിതരണത്തിനുള്ള തുക കണ്ടെത്തിയത്. സ്​കൂൾ മാനേജർ ഫാ. ടിനു തോമസ്​, ഹെഡ്മിസ്​ട്രസ്​ സിസ്​റ്റർ ജയ മൈക്കിൾ എന്നിവരും അധ്യാപകരും പി.ടി.എ ഭാരവാഹികളും ഭവനസന്ദർശനത്തിന് നേതൃത്വം നൽകി.