ഇൻസ്​റ്റിറ്റ്യൂഷനൽ ക്വാറ​ൻറീൻ ഏർപ്പെടുത്തണം

മട്ടാഞ്ചേരി: ഫോർട്ട്​കൊച്ചി, മട്ടാഞ്ചേരി പ്രദേശങ്ങളിൽ കോവിഡ് വ്യാപനം കൂടുന്നത് കണക്കിലെടുത്ത് ആളുകൾ ക്വാറൻറീനിൽ പോകാൻ നിർബന്ധിതമായ സാഹചര്യത്തിൽ പല വീട്ടിലും സൗകര്യമില്ലാതെ പ്രയാസപ്പെടുകയാണ്. ഈ സാഹചര്യത്തിൽ സർക്കാർ സംവിധാനത്തിൽതന്നെ പ്രദേശവാസികൾക്ക് ക്വാറൻറീൻ ഏർപ്പെടുത്തണമെന്ന് വെൽഫെയർ പാർട്ടി കൊച്ചി മണ്ഡലം കമ്മിറ്റി ആവശ്യപ്പെട്ടു. കരുവേലിപ്പടി താലൂക്ക് ആശുപത്രി കോവിഡ് ആശുപത്രിയായി പ്രഖ്യാപിച്ചതോടെ ഇതര രോഗികൾക്ക് ചികിത്സാ സൗകര്യം നിഷേധിക്കപ്പെടുകയാണ്. ഇത്​ മുഖ്യമന്ത്രിയുടെ ശ്രദ്ധയിൽ കൊണ്ടുവരാൻ ഇ-മെയിലിങ്​ കാമ്പയിൻ നടത്താനും കമ്മിറ്റി തീരുമാനിച്ചു. മണ്ഡലം പ്രസിഡൻറ്​ കെ.എം. ആഷിഖ് അധ്യക്ഷത വഹിച്ചു. സെക്രട്ടറി എം.എസ്. അബ്​ദുസ്സലാം റിപ്പോർട്ട് അവതരിപ്പിച്ചു. സി.എ. ജാസ്മിൻ, സി.എ. നസീർ, സി.കെ. മുഹമ്മദ് നവാസ്, കെ.ഐ. ജബ്ബാർ, ലത്തീഫ് കരുവേലിപ്പടി എന്നിവർ സംസാരിച്ചു.