വിധവ പുനർവിവാഹം കഴിച്ചാലും നഷ്​ടപരിഹാരത്തിന്​ അർഹത ഇല്ലാതാകില്ല -ഹൈകോടതി

കൊച്ചി: വാഹനാപകടത്തിൽ ഭർത്താവിനെ നഷ്​ടപ്പെട്ട സ്ത്രീ പുനർവിവാഹം കഴിച്ചാലും നഷ്​ടപരിഹാരത്തിനുള്ള അർഹത ഇല്ലാതാകില്ലെന്ന്​ ഹൈകോടതി. ഭർത്താവ്​ മരണപ്പെട്ട്​ മൂന്നു വർഷത്തിനുശേഷം യുവതി പുനർവിവാഹം ചെയ്​തതിനാൽ നഷ്​ടപരിഹാരത്തിനുള്ള അർഹത കുറയുമെന്ന ഇൻഷുറൻസ് കമ്പനിയുടെ വാദം തള്ളിയാണ്​ ജസ്​റ്റിസ്​ എൻ. നഗരേഷി​ൻെറ ഉത്തരവ്​. 2002 ജനുവരിയിൽ എറണാകുളം-പാലാരിവട്ടം റോഡിൽ കാറിടിച്ച്​ മരിച്ച ബൈക്ക്​ യാത്രക്കാരൻ മൂവാറ്റുപുഴ സ്വദേശി അനിൽ എബ്രഹാമി​ൻെറ ഭാര്യയും മാതാപിതാക്കളും സമർപ്പിച്ച അപ്പീലാണ്​ കോടതി പരിഗണിച്ചത്​. ട്രൈബ്യൂണൽ അനുവദിച്ച തുക കുറഞ്ഞുപോയെന്നും കൂട്ടിക്കിട്ടണമെന്നുമാവശ്യപ്പെട്ടായിരുന്നു അപ്പീൽ. വിവാഹം കഴിഞ്ഞ്​ മൂന്നു​ മാസത്തിനകമാണ്​ ഭർത്താവിന്​ ദാരുണ മരണമുണ്ടായത്​. 21 വയസ്സ്​​ മാത്രം പ്രായമുണ്ടായിരുന്ന യുവതി മൂന്നുവർഷം കഴിഞ്ഞ്​ 2005ൽ പുനർവിവാഹം നടത്തി. എന്നാൽ, നഷ്​ടപരിഹാര കേസ് നിലനിൽക്കെ യുവതി പുനർവിവാഹിതയായത്​ ചൂണ്ടിക്കാട്ടിയാണ്​ യുനൈറ്റഡ് ഇന്ത്യ ഇൻഷുറൻസ് നഷ്​ടപരിഹാരത്തിന്​ അർഹത കുറഞ്ഞതായി ചൂണ്ടിക്കാട്ടിയത്​. എന്നാൽ, ഭർത്താവിനെ നഷ്​ടപ്പെട്ട യുവതി ശേഷിക്കുന്ന കാലം മുഴുവൻ വൈധവ്യം അനുഭവിച്ച്​ കണ്ണീരുമായി കഴിയണമെന്ന് സമൂഹം ആഗ്രഹിക്കുന്നില്ലെന്ന്​​ കോടതി ചൂണ്ടിക്കാട്ടി. ജീവിതശൈലിയിലും സാമൂഹിക-സാമ്പത്തിക രീതികളിലും കാലം ഒ​ട്ടേറെ മാറ്റങ്ങൾ വരുത്തിയിട്ടുണ്ട്​. ഇൗ മാറ്റം നിയമപരമായ ചിന്താഗതിയിലും ഉണ്ടാകണം. പുനർവിവാഹത്തോടെ സ്ത്രീ മുൻഭർത്താവി​ൻെറ വീട്ടുകാരുമായുള്ള ബന്ധം വിച്ഛേദിക്കുമെന്ന്​ കരുതാനാവില്ല. ഭർത്താവി​ൻെറ മരണംമൂലം സ്ത്രീ അനുഭവിക്കുന്ന മാനസികാഘാതവും നിരാശ്രയത്വവും ജോലി നേടി സ്വയംപര്യാപ്തയാകുന്നതിലൂടെയോ പുനർവിവാഹിതയാകുന്നതിലൂടെയോ ഇല്ലാതാകില്ല. ഭാര്യക്ക്​ 25ഉം മാതാപിതാക്കൾക്ക് 75ഉം ശതമാനം വീതം ആകെ 7,64,500 രൂപയാണ്​ ട്രൈബ്യൂണൽ അനുവദിച്ചത്. മരിച്ചയാളുടെ വരുമാനം ഉൾപ്പെടെ വിവിധ ഇനങ്ങളിൽ കണക്കാക്കിയ നഷ്​ടപരിഹാരം കുറഞ്ഞുപോയെന്നും 23.2 ലക്ഷം രൂപക്ക്​ അർഹതയുണ്ടെന്നും​ കോടതി വ്യക്തമാക്കി. ബാക്കി തുക ഇൻഷുറൻസ് കമ്പനി ഒരുമാസത്തിനകം പലിശ സഹിതം നൽകാനും നിർദേശിച്ചു.