ഡോക്ടറുടെ ചികിത്സ; വിളവിന്​ മധുരമേറെ

ഇന്ന്​ കർഷകദിനം തൊടുപുഴ: മുന്നിലിരിക്കുന്നവരുടെ രോഗം മനസ്സിലാക്കി ചികിത്സിച്ച്​ ഭേദമാക്കുന്ന അതേ കരുതൽ തന്നെയാണ്​ കൃഷിയുടെ കാര്യത്തിലും ഡോ. തോമസ്​ എബ്രഹാമിന്​​. നാലുവർഷമായി തനിക്ക്​ പോസിറ്റിവ്​ എനർജി നൽകുന്ന സ്ഥലമാണ്​​ ​കൃഷിയിടമെന്ന്​ ഡോക്ടർ നിസ്സംശയം പറയും. രോഗികളുടെ വേദനകളും മരുന്നും നിറഞ്ഞ ആശുപത്രി മുറികളിലെ തിരക്കുകളിൽനിന്ന്​ അൽപം മാറിയാൽ ആദ്യം പോകുക തന്‍റെ കൃഷിയിടത്തിലേക്കാകും​. 40 വർഷം മുമ്പ്​ പിതാവായ ഡോ. എബ്രഹാം​ തേക്കിൻകാട്ടിലാണ്​ ആശുപത്രിക്ക്​ സമീപം കൃഷി ആരംഭിക്കുന്നത്​​. പരീക്ഷണം വിജയംകണ്ടതോടെ കൃഷി പതിയെപ്പതിയെ വളർന്നു. പിതാവിനിപ്പോൾ 96 വയസ്സായി. കൃഷിയോട്​ ഏറെ താൽപര്യമുണ്ടായിരുന്നതിനാൽ നാല്​ വർഷം മുമ്പ്​​​ തോമസ്​ എബ്രഹാം കൃഷിയിലേക്കുകൂടി​ ഇറങ്ങുകയായിരുന്നു. തൊടുപുഴക്ക്​ സമീപം തെക്കുംഭാഗത്താണ്​ പത്ത്​ ഏക്കറിൽ​​ റംബൂട്ടാൻ തോട്ടമുള്ളത്​​. ഇവിടെ ജാതി, കൊക്കോ, വാനില, മാങ്കോസ്റ്റീൻ, ഡ്രാഗൺ ഫ്രൂട്ട് എന്നിവയും ഉണ്ട്​. ജൈവകൃഷിരീതി തന്നെയാണ്​ പിന്തുടരുന്നത്​. ആട്ടിൻകാഷ്ഠവും ഒപ്പം കോഴിക്കാഷ്ഠവുമാണ് റംബൂട്ടാന്​ നൽകുന്ന വളങ്ങൾ. തുള്ളിനനയിലൂടെ റംബൂട്ടാൻ മരങ്ങളുടെ ചുവട്ടിൽ വെള്ളവുമെത്തിക്കും. കൂടുതൽ ജലാശം എല്ലായിടത്തും എത്തിക്കാൻ നൂതന സംവിധാനങ്ങൾ കൃഷിയിടത്തിൽ സജ്ജമാക്കാനുള്ള തയാറെടുപ്പിലാണ്​ ഡോക്ടർ. മൊബൈൽ ഫോണുമായി ബന്ധിപ്പിച്ച് വീട്ടിലിരുന്നുതന്നെ നനക്കാനുള്ള സംവിധാനം ഏറെപ്പെടുത്തുന്നതുമായി ബന്ധപ്പെട്ട പ്രവർത്തനങ്ങൾ പുരോഗമിക്കുകയാണ്​. വിളപരിപാലനം പ്രയോജനപ്പെടുത്താൻ ഡ്രോൺ വഴിയുള്ള വളം-കീടനാശിനി പ്രയോഗത്തിനും ശ്രമം തുടങ്ങിയിട്ടുണ്ട്​. ഇത്​ കൂടാതെ ഡ്രാഗൺ ഫ്രൂട്ട് കൃഷിയും തുടങ്ങിയിട്ടുണ്ട്​. റംബൂട്ടാന് ഇടവിളയായി കൂവകൃഷിയുണ്ട്. എല്ലാദിസവും രാവിലെ റൗണ്ട്​സിന്​ പോകുംമുമ്പേ കൃഷിയിടത്തിൽ എത്താൻ ഡോക്ടർ ശ്രദ്ധിക്കാറുണ്ട്​. കാര്യങ്ങൾ വിലയിരുത്തി ജോലിക്കാർക്ക്​ ആവശ്യമായ നിർദേശങ്ങൾ നൽകും. പിതാവിന്‍റെ ഉപദേശവും ഭാര്യ പിങ്കിയും മക്കളുമടങ്ങുന്ന കുടുംബാംഗങ്ങളുടെ പിന്തുണയും ഡോക്ടർ ജോലിക്കൊപ്പം കൃഷിയെ മുന്നോട്ട്​ നയിക്കുന്നതിൽ പ്രധാന ഘടകമാണ്​. രോഗികൾക്ക്​ ആശുപത്രിയിൽ സൗഖ്യം ലഭിക്കുമ്പോൾ തന്‍റെ​ മനസ്സിന്​ കൃഷിയിലൂടെ വലിയ ആനന്ദം ലഭിക്കുന്നുണ്ടെന്നും ഡോക്ടർ പറയുന്നു. ​TDL DR THOMAS ABRAHAM ഡോ. തോമസ്​ എബ്രഹാം റംബൂട്ടാൻ കൃഷിയിടത്തിൽ വിളവ് നൂറുമേനി; ഒരുവിഹിതം ജീവകാരുണ്യത്തിന്​ കുമളി: പൊതുപ്രവർത്തനത്തിന്‍റെ തിരക്കിനിടയിലും വീടിന്​ പരിസത്തെ കൃഷിയിടത്തിൽ വിളവുകൾ നൂറുമേനിയിലെത്തിക്കുന്ന കാര്യത്തിൽ ഷാജിമോൻ പിശുക്ക്​ കാട്ടാറില്ല. ഗ്രാമപഞ്ചായത്ത് മെംബറായിരുന്ന ഷാജിമോൻ ശ്രീധരൻ നായർ വീടിനു ചുറ്റുമുള്ള 80 സെന്‍റ്​ സ്ഥലത്ത് പച്ചക്കറിയും നാണ്യവിളകളും കൃഷിചെയ്താണ് നൂറുമേനി കൊയ്തത്. കൃഷിയിടത്തിലെ വരുമാനത്തിൽ ഒരുവിഹിതം ജീവകാരുണ്യ പ്രവർത്തനങ്ങൾക്കുകൂടി നീക്കിവെക്കാൻ തിരക്കിനിടയിലും ഷാജിയും കുടുംബവും മറക്കാറില്ല. ഭാര്യ ശാന്തി കുമളി ഗ്രാമപഞ്ചായത്ത് പ്രസിഡന്‍റാണ്​. പുലർച്ച നാലിന്​ തുടങ്ങുന്ന ദിവസത്തിലെ തിരക്ക് രാത്രി പത്തിനും തീരില്ല. കൃഷി കൂടാതെ എരുമകളും പശുക്കളും ഉണ്ട്​. വീടിന്​ സമീപം ഗ്രോബാഗുകളിലും കൃഷിയുണ്ട്​. കൃഷിയിടത്തിൽ വിളഞ്ഞ പടവലവും വെണ്ടയും ചേനയും ഉൾപ്പെടെ ഫലങ്ങൾ വിൽക്കുന്നതിനേക്കാൾ കൂടുതൽ നാട്ടുകാർക്ക് സൗജന്യമായി വിതരണം ചെയ്യുകയാണ് പതിവ്. വീടിന്​ സമീപം പുതിയ കൂടുകൾ നിർമിച്ച് ഇതിൽ പ്രാവ്, കിളികൾ, മുയൽ, ഗിനിപ്പന്നി, കരിങ്കോഴി, അലങ്കാര കോഴികൾ, ലൗ ബേർഡ്സ് എന്നിങ്ങനെ താറാവും നായ്ക്കളെയും വരെ വളർത്തുന്നുണ്ട്​. മൂന്ന് മക്കളും കുടുംബവും കൃഷിയും പൊതുപ്രവർത്തനവും എല്ലാം ചേർന്ന് തിരക്കിന്‍റെ നടുവിലാണ് കളരിക്കൽ വീട്ടിൽ ഷാജിമോൻ. ​TDL SHAJIMON സ്വന്തമായി വിളയിച്ച ഒരുമൂട് ചേനയുമായി ഷാജിമോൻ