ശ്രീകൃഷ്ണജയന്തി ആഘോഷിക്കും

തൊടുപുഴ: ശ്രീകൃഷ്​ണ ജയന്തിയോടനുബന്ധിച്ച്​ വിവിധ ക്ഷേത്രങ്ങളുടെ ആഭിമുഖ്യത്തിൽ ശോഭായാത്രകൾ സംഘടിപ്പിക്കും. കാരിക്കോട് ദേവീക്ഷേത്രം, കാഞ്ഞിരമറ്റം ശ്രീമഹാദേവക്ഷേത്രം, മുതലിയാർമഠം ശ്രീമഹാദേവക്ഷേത്രം, മുതലക്കോടം ശ്രീമഹദേവക്ഷേത്രം, ആരവല്ലിക്കാവ് ശ്രീഭഗവതി ക്ഷേത്രം, നെല്ലിക്കാവ് ശ്രീഭഗവതി ക്ഷേത്രം, മണക്കാട് ശ്രീനരസിംഹസ്വാമി ക്ഷേത്രം, കാഞ്ഞിരംപാറ, ഒളമറ്റം, മലങ്കര കാട്ടോലി, തെക്കുംഭാഗം ശ്രീധർമശാസ്​ത ക്ഷേത്രം, കാപ്പിത്തോട്ടം പുതുപ്പരിയാരം എന്നിവിടങ്ങളിൽനിന്ന്​ തൊടുപുഴ ശ്രീകൃഷ്ണസ്വാമിക്ഷേത്ര സന്നിധിയിലേക്ക് ശോഭായാത്ര നടക്കും. വർണശബളമായ നിശ്ചലദൃശ്യങ്ങളും വാദ്യമേളങ്ങളും ശോഭായാത്രക്ക്​ അകമ്പടിയേകും. മഹാശോഭായാത്ര വൈകീട്ട് അഞ്ചിന്​ കാരിക്കോട് ദേവീക്ഷേത്രത്തിൽനിന്ന്​ ആരംഭിച്ച് നഗരംചുറ്റി മണക്കാട് ജങ്​ഷൻ വഴി 6.45ന് തൊടുപുഴ ശ്രീകൃഷ്ണസ്വാമി ക്ഷേത്ര സന്നിധിയിൽ പ്രവേശിക്കും. തുടർന്ന് കൃഷ്ണതീർഥം കല്യാണമണ്ഡപത്തിൽ പ്രസാദവിതരണം നടക്കും. ബഫര്‍സോണ്‍ വിരുദ്ധ ദിനം നെടുങ്കണ്ടം: ഇന്ത്യന്‍ ഫാര്‍മേഴ്‌സ് അഗ്രോ മൂവ്‌മെന്‍റിന്‍റെ നേതൃത്വത്തില്‍ കര്‍ഷകദിനമായ ചിങ്ങം ഒന്ന് ബഫര്‍സോണ്‍ വിരുദ്ധ ദിനമായി ആചരിക്കും. ഇതിന്‍റെ ഭാഗമായി ബുധനാഴ്ച തൂക്കുപാലത്ത് പ്രകടനവും പൊതുസമ്മേളനവും നടത്തുമെന്ന്​ ഇന്‍ഫാം ജില്ല ജോയന്‍റ്​ ഡയറക്ടര്‍ ഫാ. ജിന്‍സ് കിഴക്കേല്‍, സെബാസ്റ്റ്യന്‍ മുക്കുങ്കല്‍, ഫാ. തോമസ് ഞള്ളിയില്‍, ജോര്‍ജ് മുല്ലൂര്‍ എന്നിവര്‍ അറിയിച്ചു. ഇന്‍ഫാം നേതൃത്വത്തില്‍ വിവിധ താലൂക്കുകളില്‍ നടത്തുന്ന ബഫര്‍സോണ്‍ വിരുദ്ധ ദിനാചരണത്തിന്റെ ഭാഗമായാണ് തൂക്കുപാലത്തും പരിപാടി സംഘടിപ്പിച്ചിരിക്കുന്നത്. വൈകീട്ട്​ നാലിന്​ തൂക്കുപാലം ബസ് സ്റ്റാൻഡില്‍നിന്ന്​ ആരംഭിക്കുന്ന പ്രകടനം ടൗണ്‍ചുറ്റി ലൈബ്രറി മൈതാനിയിൽ സമാപിക്കും. തുടര്‍ന്ന് നടക്കുന്ന പൊതുസമ്മേളനത്തില്‍ ഇന്‍ഫാം കാര്‍ഷിക ജില്ല മാര്‍ക്കറ്റിങ്​ സെല്‍ ഡയറക്ടര്‍ ഫാ. ജസ്റ്റിന്‍ മതിയത്ത് സംസാരിക്കും.