യോഗം കലക്കാനെത്തിയവരെ തുരത്തി വണ്ടിപ്പേട്ട മൈതാന​ത്തെ ജനക്കൂട്ടം

തൊടുപുഴ: സർ സി.പി. രാമസ്വാമി അയ്യരുടെ മർദനമുറകൾ കൊടുമ്പിരിക്കൊണ്ട കാലം. സമരമുഖത്തിറങ്ങിയവർ കൊടിയ മർദനം നേരിടേണ്ടിവന്നു. തൊഴിലാളികൾക്ക്​ പുറമെ കോൺഗ്രസ്​ സോഷ്യലിസ്റ്റ്​ വിഭാഗത്തിലുള്ളവരെയും മറ്റ്​ പ്രമുഖ നേതാക്കളെയും അറസ്റ്റ്​ ചെയ്യുന്നതും പൊലീസിനെയും ഗുണ്ടകളെയും ഉപയോഗിച്ച്​ മർദിക്കുന്നതും പതിവായി. സർ സി.പിയുടെ സ്വതന്ത്ര തിരുവിതാംകൂർ പ്രസ്ഥാനത്തിനെതിരെ ഉയർന്നുവന്ന ജനരോഷം വലുതായിരുന്നു. ജീവിതത്തിന്‍റെ നാനാതുറകളിലുള്ളവർ സമരങ്ങളിൽ സജീവമായി പ​ങ്കെടുത്തു. തൊടുപുഴ വണ്ടിപ്പേട്ട മൈതാനം അക്കാലത്ത്​ പൊതുയോഗങ്ങളുടെ സ്ഥിരം വേദികളിലൊന്നാണ്​. ഇവിടെയാണ്​​ പിൽക്കാലത്ത്​ ഫോറസ്റ്റ്​ റെയ്​ഞ്ച്​ ഓഫിസ്​ പ്രവർത്തിച്ചത്​. സി.പിയുടെ അടിച്ചമർത്തലുകൾക്കും മർദനങ്ങൾക്കുമെതിരെ വണ്ടിപ്പേട്ട മൈതാനത്ത്​ വിപുലമായ പ്രതിഷേധ യോഗം സംഘടിപ്പിച്ചു. യോഗത്തിന്​ മു​ന്നോടിയായി വ്യാപക പ്രചാരണവും നടന്നിരുന്നു. സി.പിക്കെതിരെ സമൂഹത്തിൽ നിലനിന്നിരുന്ന രോഷത്തിന്‍റെ പ്രതിഫലനം കൂടിയായിരുന്നു യോഗത്തിലെ ബഹുജന പങ്കാളിത്തം. യോഗം തുടങ്ങുന്നതിന്​ ഏറെ മുമ്പ്തന്നെ മൈതാനം ജനങ്ങളെ കൊണ്ട്​ തിങ്ങിനിറഞ്ഞു. സി.പിയുടെ പൊലീസും എക്​സൈസും അവരുടെ കീഴിലെ ഗുണ്ടാ സംഘങ്ങളും യോഗം പൊളിക്കാൻ തീരുമാനിച്ചു. മദ്യലഹരിയിൽ ആളുകൾക്കിടയിൽ ഇടംപിടിച്ച ഇക്കൂട്ടർ പാട്ടയും കല്ലും കത്തിയുമെല്ലാം കൈയിൽ കരുതിയിരുന്നു. യോഗനടപടികൾ ആരംഭിച്ചതോടെ ഇവർ കൂക്കിവിളിക്കാനും പാട്ട കൊട്ടി തെറിപ്പാട്ട്​ പാടാനും തുടങ്ങി. ആർ.വി. തോമസായിരുന്നു യോഗത്തിലെ മുഖ്യ പ്രാസംഗികൻ. അദ്ദേഹം എത്തുമ്പോഴേക്കും സി.പിയുടെ പിണിയാളുകൾ രംഗം അല​ങ്കോലമാക്കിയിരുന്നു. വേദിയിലേക്ക്​ നീങ്ങിയ തോമസിനെ സുരക്ഷയെ കരുതി പ്രവർത്തകർ തടഞ്ഞെങ്കിലും അദ്ദേഹം അതൊന്നുംവകവെച്ചില്ല. എല്ലാവർക്കും അഭിവാദ്യം അർപ്പിച്ച്​ തോമസ്​ പ്രസംഗം ആരംഭിച്ചതോടെ പൊലീസ്​ ചെല്ലും ​ചെലവും കൊടുത്ത്​ കൊണ്ടുവന്ന സാമൂഹികവിരുദ്ധർ കല്ലെറിയാൻ തുടങ്ങി. ഈ സമയം സദസ്സിന്‍റെ മുൻഭാഗത്തുണ്ടായിരുന്ന കെ.എം. ജോർജ്​, പി.എം. വർഗീസ്​, അഗസ്റ്റിൻ വഴുതനപ്പിള്ളി, പി. വാവച്ചൻ, കെ.എം. തോമസ്​, കുമാരമംഗലം നാരായണൻ നായർ, തെള്ളിയാങ്കൽ മാത്തച്ചൻ തുടങ്ങിയവർ ആർ.വി. തോമസിന്‍റെ ചുറ്റും നിരന്ന്​ രക്ഷാകവചമൊരുക്കി. ഈ അവസരം നോക്കി വളന്‍റിയർമാർ അദ്ദേഹത്തെ എടുത്ത്​ ദൂരേക്ക്​ കൊണ്ടുപോയി. യോഗം അല​ങ്കോലപ്പെട്ടതിൽ രോഷാകുലരായ ജനക്കൂട്ടം പൊലീസിന്‍റെയും എക്​സൈസിന്‍റെയും ഗുണ്ടാസംഘത്തെ ശരിക്കും കൈകാര്യം ചെയ്ത്​ സ്ഥലത്തുനിന്ന്​ തുരത്തി. സംഭവത്തിൽ അഗസ്റ്റിൻ വഴുതനപ്പിള്ളി, പട്ടാളം നീലകണ്ഠപ്പിള്ള എന്നറിയപ്പെടുന്ന പി. നീലകണ്ഠപ്പിള്ള, നെല്ലുവേലി കുട്ടിയച്ചൻ എന്ന എൻ.സി. മാത്യു തുടങ്ങി 11 ​പേ​രെ പ്രതികളാക്കി പൊലീസ്​ കേസെടുത്തു. സ്വാതന്ത്ര്യലബ്​ധിക്ക്​ ശേഷം കുറച്ചുകാലം കൂടി ഈ​​ കേസ്​ നീണ്ടുപോയെങ്കിലും അവസാനം തള്ളപ്പെട്ടു.