പ്ലാസ്റ്റിക് നിരോധനം: പരിശോധനക്ക്​ പ്രത്യേക സ്​ക്വാഡ്

തൊടുപുഴ: പ്ലാസ്റ്റിക് നിരോധനത്തിന്‍റെ ഭാഗമായുള്ള പരിശോധനക്ക്​ താലൂക്ക്​ അടിസ്ഥാനത്തിൽ പ്രത്യേക സ്​ക്വാഡ്​ രൂപവത്​കരിക്കുന്നു. ഒറ്റത്തവണ ഉപയോഗിക്കാവുന്ന പ്ലാസ്റ്റിക് ഉൽപന്നങ്ങൾക്കുള്ള നിരോധനം പൂർണമായി നടപ്പിൽ വരുത്തുന്നതിന്‍റെ ഭാഗമായാണ്​ പരിശോധന ശക്തമാക്കുന്നത്​. ജൂലൈ ഒന്നുമുതൽ നിരോധനം ഏർപ്പെടുത്തിയിരുന്നെങ്കിലും നടപടികൾ ശക്തമാക്കിയിരുന്നില്ല. ജില്ല കലക്ടറുടെ അധ്യക്ഷതയിൽ പഞ്ചായത്ത്​ ജോയന്‍റ്​ ഡയറക്ടർ, പൊല്യൂഷൻ കൺട്രോൾ ബോർഡ്​ എൻവയൺമെന്‍റ്​ എൻജിനീയർ, ഹരിത കേരള മിഷൻ ജില്ല കോഓഡിനേറ്റർ, തഹസിൽദാർമാർ, മുനിസിപ്പൽ സെക്രട്ടറിമാർ എന്നിവരടക്കമുള്ളവരുടെ സാന്നിധ്യത്തിൽ ചേർന്ന യോഗത്തിലാണ്​ ഇതുസംബന്ധിച്ച നടപടികൾ ശക്തമാക്കാൻ തീരുമാനങ്ങൾ സ്വീകരിച്ചത്​. റവന്യൂ വകുപ്പിൽനിന്ന്​ ഡെപ്യൂട്ടി തഹസിൽദാർ റാങ്കിലെ ജീവനക്കാരെ പരിശോധനയുടെ ഭാഗമായി ഉൾപ്പെടുത്താനും നിർദേശമുണ്ട്​. മലിനീകരണ നിയന്ത്രണ ബോർഡും പഞ്ചായത്തും ചേർന്ന്​​ ഇതുസംബന്ധിച്ച ബോധവത്കരണവും നടത്താൻ യോഗം നിർദേശിച്ചിട്ടുണ്ട്​. വ്യാപാരി വ്യവസായികൾ ഹോട്ടൽ അസോസിയേഷൻ എന്നിവർക്ക്​ അടക്കം ബോധവത്​കരണം നൽകണമെന്നും നിർദേശം ഉണ്ട്​. ഇതുവരെ പരിശോധന നടത്തിയത്​ 33 പഞ്ചായത്തുകളിൽ ഇതുവരെ 33 പഞ്ചായത്തിൽ പരിശോധന നടത്തി. 18 പഞ്ചായത്തിൽ രണ്ടാംഘട്ട പരിശോധനയും നടത്തി​. ഇപ്പോഴും പല വ്യാപാര സ്ഥാപനങ്ങളിലും ഇത്തരം പ്ലാസ്റ്റിക്കുകൾ വിൽക്കുന്നതായി പരിശോധനക്ക്​ നേതൃത്വം നൽകിയവർ പറഞ്ഞു. മീൻ, ഇറച്ചി എന്നിവ വിൽക്കുന്ന സ്ഥാപനങ്ങളിലടക്കം ഇപ്പോഴും പ്ലാസ്റ്റിക്​ ഉപയോഗിക്കുന്നുണ്ട്​. പ്ലാസ്റ്റിക്​ കാരി ബാഗുകൾ, കപ്പുകൾ, സ്​​ട്രോകൾ, സ്പൂണുകൾ, ഷീറ്റുകൾ, കൊടിതോരണങ്ങൾ, ബ്രാൻഡ്​ ചെയ്യാത്ത ജ്യൂസ്​ പാക്കുകൾ, പി.വി.സി ഫ്ലക്സുകൾ, അരലിറ്ററിൽ താഴെയുള്ള വെള്ളക്കുപ്പികൾ, തെർമോക്കോൾ പ്ലേറ്റുകൾ, പേപ്പർ കപ്പുകൾ, നേവൺ വൂവൽ പോളി പ്രോപ്പലിൻ കാരിബാഗുകൾ എന്നിവക്കടക്കമാണ്​​ നിരോധനം നിലവിലുള്ളത്​. പക്ഷേ, ഇവയെല്ലാം കടകളിൽ സുഗമമായി ലഭിക്കുന്നുണ്ട്​. പരിശോധനയിൽ സ്ക്വാഡിനൊപ്പം​ പൊലീസിന്‍റെ​ സഹായംകൂടി ഉൾപ്പെടുത്താൻ തീരുമാനമായിട്ടുണ്ട്​. കുടുംബശ്രീ വഴി ബദൽ ഉൽപന്നങ്ങൾ ജനങ്ങളിലെത്തിക്കാനും നിർദേശം നൽകിയിട്ടുണ്ട്​. പേപ്പര്‍ ബാഗുകള്‍, തുണിസഞ്ചികള്‍, പേപ്പര്‍ ഷീറ്റുകള്‍, വാഴയില, സ്റ്റീല്‍, സെറാമിക് പാത്രങ്ങള്‍, പേപ്പര്‍, തുണി, കൊടി തോരണങ്ങള്‍, തുണി ബാനറുകള്‍ എന്നിവക്കാകും മുൻഗണന. ആദ്യപടിയെന്ന നിലയില്‍ വ്യാപാരികളടക്കമുള്ളവർക്ക്​ നിരോധിത പ്ലാസ്റ്റിക് ഉൽപന്നങ്ങൾ സൂക്ഷിക്കുകയും ഉപയോഗിക്കുകയും ചെയ്യരുതെന്ന് താക്കീത്​ നല്‍കി. ഇതിനുപകരം ഉപയോഗിക്കാവുന്ന ഉൽപന്നങ്ങളെ സംബന്ധിച്ച് വ്യാപാരികള്‍ക്ക് ബോധവത്കരണം നല്‍കുന്നുണ്ട്​. ആദ്യഘട്ടത്തിൽ മുന്നറിയിപ്പും നിരോധിത പ്ലാസ്റ്റിക് ഉൽപന്നങ്ങള്‍ പിടികൂടിയാല്‍ 10,000 രൂപ മുതല്‍ 50,000 രൂപ വരെ പിഴയീടാക്കുന്നതുള്‍പ്പെടെ കര്‍ശന നടപടികള്‍ സ്വീകരിക്കുമെന്ന് ആരോഗ്യവകുപ്പ് അധികൃതര്‍ പറഞ്ഞു.