എം.എൽ.എയുടെ സഹോദരൻ ഭീഷണിപ്പെടുത്തിയെന്ന്​ കോൺഗ്രസ്​ നേതാവിന്‍റെ പരാതി

​ മൂന്നാർ: ദേവികുളം എം.എൽ.എ അഡ്വ. എ. രാജയുടെ സഹോദരൻ ഭീഷണിപ്പെടുതിയതായി കാണിച്ച് മണ്ഡലത്തിൽ യു.ഡി.എഫ് സ്ഥാനാർഥിയായിരുന്ന ഡി. കുമാർ പൊലീസിൽ പരാതി നൽകി. ഹൈകോടതിയിൽ തെരഞ്ഞെടുപ്പ് ഹരജി നൽകിയതിന്റെ വൈരാഗ്യത്തിൽ തന്നെ അപായപ്പെടുത്തുമെന്ന് ഭീഷണിപ്പെടുത്തിയതായി കുമാർ മൂന്നാർ ഡിവൈ.എസ്​.പിക്ക്​ നൽകിയ പരാതിയിൽ പറയുന്നു. വെള്ളിയാഴ്ച രാത്രി എം.എൽ.എയുടെ സഹോദരൻ എ. ശക്തിവേൽ തന്നെ ഫോണിൽ വിളിച്ച് അസഭ്യം പറയുകയും അപായപ്പെടുത്തുമെന്ന് ഭീഷണിപ്പെടുത്തുകയും ചെയ്തതെന്നാണ്​ കുമാറിന്‍റെ പരാതി. പട്ടികജാതി വിഭാഗക്കാർക്ക്​ സംവരണം ചെയ്ത ദേവികുളം മണ്ഡലത്തിൽ ക്രൈസ്തവ സഭാംഗമായ എ. രാജ വ്യാജ ജാതി സർട്ടിഫിക്കറ്റ്​ നേടിയാണ്​ മത്സരിച്ചതെന്ന്​ ആരോപിച്ചാണ്​ കുമാർ ഹരജി ഫയൽ ചെയ്തത്​. രാജയുടെ ജാതി വ്യക്തമാക്കുന്ന രേഖകൾ ഹാജരാക്കാൻ സി.എസ്​.ഐ കൊച്ചി മഹായിടവക ബിഷപ്പിനോട്​ കഴിഞ്ഞദിവസം കോടതി ആവശ്യപ്പെട്ടിരുന്നു.