കരട് മാസ്റ്റർ പ്ലാൻ: കട്ടപ്പന നഗരസഭ അടിയന്തര കൗൺസിൽ ചേരും

കട്ടപ്പന: സമഗ്ര വികസനം ലക്ഷ്യമാക്കിയുള്ള കരട് മാസ്റ്റർ പ്ലാൻ നടപ്പിലാക്കാൻ അടിയന്തര യോഗം ചേരാൻ കട്ടപ്പന നഗരസഭ കൗൺസിൽ തീരുമാനിച്ചു. ടൗൺ പ്ലാനിങ്​ ഓഫിസർ അടക്കമുള്ള ഉദ്യോഗസ്ഥരെ പങ്കെടുപ്പിച്ചാകും കൗൺസിൽ ചേരുക. നഗരസഭ സെക്രട്ടറിക്ക്​ നഗര-ഗ്രാമ ആസൂത്രണ വകുപ്പിൽനിന്ന്​ ലഭിച്ചിട്ടുള്ള ഭേദഗതി നിർദേശങ്ങൾ കരട് മാസ്റ്റർപ്ലാനിൽ ഉൾപ്പെടുത്തി തയാറാക്കുന്നതിനാണ് വിഷയം കൗൺസിൽ അംഗീകാരത്തിനായി സമർപ്പിച്ചത്. എന്നാൽ, പുതിയ നിർദേശങ്ങൾ വിശദമായി പരിശോധിച്ചശേഷമേ അംഗീകരിക്കാവൂ എന്ന് കൗൺസിലർമാർ അഭിപ്രായപ്പെട്ടു. നഗരസഭ പരിധിയിലെ ഭൂവിനിയോഗം, റോഡ് നെറ്റ്​വർക്, നഗരവികസനം, ടൂറിസം, വാണിജ്യ സ്ഥാപനങ്ങൾ എന്നിവയുടെ നിലവിലെ സ്ഥിതി, വികസന സാധ്യതകൾ എന്നിവ ഉൾക്കൊള്ളിച്ചാണ് മാസ്റ്റർ പ്ലാൻ തയാറാക്കുക. നഗരസഭ അറവുശാലയിൽ മാടിനെ അറുക്കുന്ന കൂലി വർധിപ്പിക്കണമെന്ന കരാറുകാരന്റെ ആവശ്യം കൗൺസിലിൽ പരിഗണിച്ചു. കൂലി വർധിപ്പിക്കേണ്ട സാഹചര്യമുണ്ടോയെന്ന് പരിശോധിക്കാൻ സ്‌റ്റിയറിങ്​ കമ്മിറ്റിയെ ചുമതലപ്പെടുത്തി. വനാതിർത്തികൾ പങ്കിടുന്ന മുളകരമേട് 33ആം വാർഡ് ഉൾപ്പെടെ സ്ഥലങ്ങൾ ബഫർസോണിൽ ഉൾപ്പെടുമോയെന്നുള്ള ജനങ്ങളുടെ ആശങ്ക കണക്കിലെടുത്ത് പ്രത്യേക വാർഡ് സഭകൾ ചേരാനും കൗൺസിൽ തീരുമാനിച്ചു. കൗൺസിൽ പ്രശാന്ത് രാജു സമർപ്പിച്ച കത്തിന്റെ അടിസ്ഥാനത്തിലാണ് തീരുമാനം. പൊലീസ് വളവ്-മജീദ്പടി-കമ്പനിപ്പടി കുടിവെള്ള പദ്ധതി ടെൻഡർ ചെയ്യാനും വാർഡ് 15ൽ കുഴൽക്കിണർ നിർമിക്കാൻ ശ്രമിച്ചപ്പോൾ സ്വകാര്യ ടെലികോം കമ്പനിയുടെ കേബിളുകൾ തകർന്ന സംഭവത്തിൽ നഷ്ടപരിഹാരമായി 17,300 രൂപ നൽകുവാനും അംഗീകാരം നൽകി.