കെ.എസ്.ആര്‍.ടി.സി ഓപറേറ്റിങ്​ സെന്‍റര്‍: അടിമാലിയുടെ കാത്തിരിപ്പ്​ നീളുന്നു

അടിമാലി: അടിമാലിയില്‍ കെ.എസ്.ആര്‍.ടി.സി ഓപറേറ്റിങ് സെന്‍റര്‍ അനുവദിക്കണമെന്ന ആവശ്യം വീണ്ടും ശക്തമാകുന്നു. ജില്ലയിലെ പ്രധാന ടൗണുകളില്‍ ഒന്നായിരുന്നിട്ടും അടിമാലിയില്‍ ഓപറേറ്റിങ് സെന്‍റര്‍ അനുവദിക്കാത്തത് അവഗണനയാണെന്നാണ്​ ആക്ഷേപം. അടിമാലി കേന്ദ്രീകരിച്ച് ഓപറേറ്റിങ്​ സെന്‍റര്‍ അനുവദിക്കണമെന്ന ആവശ്യത്തിന് കാലങ്ങളുടെ പഴക്കമുണ്ട്. നിവേദനങ്ങള്‍ പലത് സമര്‍പ്പിച്ചിട്ടും അവഗണന തുടരുകയാണ്​. വിനോദസഞ്ചാര കേന്ദ്രമായ മൂന്നാറിന്‍റെ പ്രവേശന കവാടം കൂടിയാണ് അടിമാലി. നിരവധി ദീര്‍ഘദൂര കെ.എസ്.ആര്‍.ടി.സി ബസുകള്‍ അടിമാലിയിലൂടെ കടന്നുപോകുന്നുണ്ട്​. എന്നാല്‍, ടൗണിലെത്തുന്നവര്‍ക്ക് ഈ ബസുകളുടെ സമയക്രമം തിരക്കാന്‍പോലും നിലവില്‍ സൗകര്യമില്ല. ഇത്തരം സാഹചര്യങ്ങള്‍ പരിഗണിച്ച് അടിമാലി കേന്ദ്രീകരിച്ച് ഓപറേറ്റിങ്​ സെന്‍റര്‍ അനുവദിക്കണമെന്നാണ് ആവശ്യം. അടിമാലിയിലെ സ്വകാര്യ ബസ് സ്റ്റാന്‍ഡിലാണ് കെ.എസ്.ആര്‍.ടി.സി ബസുകള്‍ക്കും പാര്‍ക്കിങ്​ അനുവദിച്ചിട്ടുള്ളത്. കോവിഡ് കാലത്തിന് മുമ്പുവരെ നൂറിന് മുകളില്‍ കെ.എസ്.ആര്‍.ടി.സി സര്‍വിസുകള്‍ അടിമാലി വഴിയുണ്ടായിരുന്നു.