കട്ടപ്പനയിൽ സി.പി.എം മാർച്ചിൽ സംഘർഷം

കട്ടപ്പന: വിമാനത്തിനുള്ളിൽ മുഖ്യമന്ത്രിക്കുനേരെ യൂത്ത് കോൺഗ്രസ് പ്രവർത്തകർ നടത്തിയ പ്രതിഷേധത്തിനെതിരെ സി.പി.എം കട്ടപ്പനയിൽ നടത്തിയ മാർച്ചിൽ പൊലീസുമായി ഉന്തും തള്ളും. യൂത്ത് കോൺഗ്രസ് സ്ഥാപിച്ച കൊടികൾ പറിച്ചെറിയാൻ ഡി.വൈ.എഫ്.ഐ പ്രവർത്തകർ നടത്തിയ ശ്രമം പൊലീസ് തടഞ്ഞപ്പോഴാണ് സംഘർഷമുണ്ടായത്​. മുതിർന്ന നേതാക്കൾ ഇടപ്പെട്ട് രംഗം ശാന്തമാക്കി. ചൊവ്വാഴ്ച രാവിലെ ഇടുക്കി കവലയിൽനിന്നാണ് സി.പി.എം മാർച്ച് ആരംഭിച്ചത്. അശോക ജങ്​ഷനിലെത്തിയതോടെ വഴിയരികിലെ കൊടികൾ നശിപ്പിക്കുകയായിരുന്നു. കെ.പി.സി.സി ആസ്ഥാന മന്ദിരത്തിനുനേരെ ഉണ്ടായ അക്രമണത്തിലും ഇടുക്കി ഡി.സി.സി അധ്യക്ഷൻ സി.പി. മാത്യുവിനുനേരെ ഡി.വൈ.എഫ്​.ഐ നടത്തിയ കൈയേറ്റ ശ്രമത്തിനുമെതിരെ കട്ടപ്പന കോൺഗ്രസ് മണ്ഡലം കമ്മിറ്റിയുടെ നേതൃത്വത്തിൽ നഗരത്തിൽ പ്രതിഷേധ പ്രകടനംനടത്തി. എ.ഐ.സി.സി അംഗം ഇ.എം. ആഗസ്‌തി ഉദ്ഘാടനം ചെയ്തു. കോൺഗ്രസ് മണ്ഡലം പ്രസിഡന്‍റ്​ തോമസ് മൈക്കിൾ, മനോജ്‌ മുരളി, ജോയ് ആനിത്തോട്ടം, ജോയ് പൊരുന്നോലി തുടങ്ങിയവർ നേതൃത്വം നൽകി.