ദുരിതമാണ്,​ കാരിക്കോട്-അഞ്ചിരി-ആനക്കയം യാത്ര

തൊടുപുഴ: കാരിക്കോട്-അഞ്ചിരി-ആനക്കയം റോഡിലൂടെയുള്ള യാത്ര ദുരിതംവിതച്ചിട്ടും അധികൃതർക്ക്​ കുലുക്കമില്ല. നൂറുകണക്കിന്​ വാഹനങ്ങൾ സഞ്ചരിക്കുന്ന റോഡിൽ ഗതാഗതം അതീവ ദുഷ്കരമായെങ്കിലും വൻ കുഴികൾ അടക്കാൻപോലും നടപടി എടുക്കുന്നില്ല. തൊടുപുഴ നഗരസഭ, ഇടവെട്ടി, ആലക്കോട് പഞ്ചായത്തുകളിലൂടെയും കടന്നുപോകുന്ന റോഡ് ഭൂരിഭാഗവും തകർന്ന്​ യാത്രചെയ്യാൻപോലും കഴിയാത്ത അവസ്ഥയിലാണ്. കാരിക്കോട് മുതൽ റോഡിൽ രൂപപ്പെട്ട കുഴികൾ ഓരോ ദിവസം ചെല്ലുന്തോറും വലിയ ഗർത്തങ്ങളായി മാറുകയാണ്. സർവിസ് ബസുകളും സ്കൂൾ ബസുകളും ഉൾപ്പെടെ നൂറുകണക്കിന്​ വാഹനങ്ങൾ സഞ്ചരിക്കുന്ന റോഡാണ് തകർന്നത്. കല്ലാനിക്കൽ സ്കൂളിലേക്കും ബാങ്കുകൾ, തെക്കുംഭാഗം രാജ്യാന്തര ക്രിക്കറ്റ് സ്റ്റേഡിയം, സർക്കാർ സ്ഥാപനങ്ങൾ, ആരാധനാലയങ്ങൾ ഉൾപ്പെടെയുള്ള സ്ഥലങ്ങളിലേക്ക് പോകുന്ന യാത്രക്കാരാണ് ഏറെ ദുരിതം അനുഭവിക്കുന്നത്. കല്ലാനിക്കൽ സ്കൂൾ ജങ്​ഷൻ, തെക്കുംഭാഗം, അഞ്ചിരി തുടങ്ങിയ ഭാഗങ്ങളിൽ പലഭാഗവും കുഴികൾ രൂപപ്പെട്ട് വലിയ കുഴിയായി മാറി. കുഴിയിൽചാടി വാഹനങ്ങൾക്ക് കേടുപാട് ഉണ്ടാകുന്നത് വാഹന ഉടമകളെ വലിയ പ്രതിസന്ധിയിൽ ആക്കുകയാണ്. ചെറു വാഹനങ്ങളും ഓട്ടോറിക്ഷകളും ഉൾപ്പെടെ ഇതുവഴി ഓടിക്കാൻപോലും കഴിയാത്ത സ്ഥിതിയാണ്. കല്ലാനിക്കൽ സ്​കൂളിന്​ സമീപം റോഡ്​ ചളിക്കുളമാണ്​. സ്​കൂൾ കുട്ടികളും കാൽനടക്കാരുമാണ്​ ഇതിന്‍റെ ദുരിതം ഏറെയും അനുഭവിക്കുന്നത്​. യൂനിഫോമിലും മറ്റും ചളി തെറിക്കാതിരിക്കാൻ വാഹനം വരുമ്പോൾ കുട്ടികൾ പരക്കംപായുകയാണ്​. ടിപ്പർ ലോറികൾ ഉൾപ്പെടെയുള്ളവയുടെ അമിത ഓട്ടവും റോഡിന്‍റെ തകർച്ചക്ക്​ കാരണമാകുന്നുണ്ടെന്ന്​​ നാട്ടുകാർ ആരോപിക്കുന്നു. TDL KARIKODE കാരിക്കോട് -ആനക്കയം റൂട്ടിൽ തെക്കുംഭാഗത്ത് തകർന്ന റോഡ്