ജാതിവ്യവസ്ഥക്കെതിരായ പോരാട്ടം ശക്തിപ്പെടുത്തണം -മന്ത്രി കെ. രാധാകൃഷ്‌ണൻ

അടിമാലി: പൊതുസമൂഹത്തിന്റെ പിന്തുണയോടെ ജാതിവ്യവസ്ഥക്കെതിരായ പോരാട്ടം ശക്തിപ്പെടുത്തണമെന്ന്‌ മന്ത്രി കെ. രാധാകൃഷ്‌ണൻ. ആദിവാസി ക്ഷേമസമിതി സംസ്ഥാന സമ്മേളനം ഉദ്‌ഘാടനം ചെയ്യുകയായിരുന്നു അദ്ദേഹം. ജാതിവ്യവസ്ഥ അവസാനിപ്പിക്കാതെ അസമത്വം പരിഹരിക്കാനാവില്ല. വർഗരാഷ്‌ട്രീയത്തെ ശക്തിപ്പെടുത്തി മാത്രമേ സാമൂഹികവ്യവസ്ഥയെ മാറ്റിമറിക്കാനാകൂ. ബി.ജെ.പി ഭരണത്തിൽ രാജ്യത്ത്‌ ആദിവാസി-ദലിത്‌ വിഭാഗങ്ങൾക്ക്‌ രക്ഷയില്ല. 10 വർഷത്തിനുള്ളിൽ ഈ വിഭാഗങ്ങൾക്കെതിരായ അതിക്രമം 66 ശതമാനം വർധിച്ചു. കുറ്റവാളികളിൽ ആറു ശതമാനം പേർ പോലും ശിക്ഷിക്കപ്പെടുന്നില്ലെന്നതും ആശങ്കജനകമാണ്‌. കേന്ദ്രഭരണത്തിനെതിരെ നാനാമേഖലയിൽനിന്ന്​ ഉയർന്നുവരുന്ന പോരാട്ടങ്ങളെ ജാതി, മത, വർഗീയ കാർഡിലൂടെ മറച്ചുവെക്കുകയാണവർ. രാജ്യത്തെ ഹിന്ദുമത രാഷ്‌ട്രമാക്കി മാറ്റി പഴയ ചാതുർവർണ്യവ്യവസ്ഥയിലേക്കുള്ള മടക്കമാണ്‌ ലക്ഷ്യമിടുന്നത്‌. മുൻവർഷത്തെ അപേക്ഷിച്ച്‌ 65 കോടിയിലേറെ രൂപയാണ്‌ സർക്കാർ പട്ടിക വിഭാഗങ്ങളുടെ ഉന്നമനത്തിന്​ ഈ വർഷം നൽകിയതെന്നും മന്ത്രി പറഞ്ഞു. ആദിവാസി ക്ഷേമസമിതി സംസ്ഥാന പ്രസിഡന്റ്‌ ഒ.ആർ. കേളു എം.എൽ.എ അധ്യക്ഷത വഹിച്ചു.