മഴയിൽ താളംതെറ്റി വാർഡുതല ശുചീകരണ-പ്രതിരോധ പ്രവർത്തനങ്ങൾ

അടിമാലി: മഴയിൽ താളംതെറ്റി പഞ്ചായത്തുകളിലെ മഴക്കാലപൂർവ ശുചീകരണ, പ്രതിരോധ പ്രവർത്തനങ്ങൾ. പകർച്ചവ്യാധികൾ തടയാൻ ഏപ്രിൽ, മേയ് മാസങ്ങളിലാണ് ശുചീകരണം നടത്തിയിരുന്നത്. ജൂണിൽ പെയ്യാറുള്ള മഴ നേരത്തേയെത്തിയതാണ് പ്രവർത്തനങ്ങൾക്കു പ്രതിസന്ധി സൃഷ്ടിച്ചത്. അടിമാലി, മാങ്കുളം, വെള്ളത്തൂവൽ, കൊന്നത്തടി, രാജാക്കാട്, രാജകുമാരി, സേനാപതി, വാത്തിക്കു​ടി തുടങ്ങി ഭൂരിഭാഗം പഞ്ചായത്തുകളിലും പ്രതിരോധ പ്രവർത്തനങ്ങൾ മുടങ്ങി. വിവിധ വകുപ്പുതല ഉദ്യോഗസ്ഥരെ പങ്കെടുപ്പിച്ച്​ മാർച്ചിൽത്തന്നെ യോഗം ചേർന്നിരുന്നു. അതിന്റെ അടിസ്ഥാനത്തിൽ തൊഴിലുറപ്പു പദ്ധതിയിൽ ഉൾപ്പെടുത്തി പഞ്ചായത്തുകൾ മുൻകൈയെടുത്ത് ശുചീകരണ പ്രവർത്തനങ്ങൾക്കു തുടക്കമായെങ്കിലും തുടർ പ്രവർത്തനങ്ങൾ മഴയെത്തുടർന്ന്​ മുടങ്ങിയ നിലയിലാണ്​. ശക്തമായി മഴ തുടരുന്നതിനാൽ ജില്ലയിൽ ഡെങ്കിപ്പനി ഉൾപ്പെടെയുള്ള പകർച്ചവ്യാധികളും പടർന്നുപിടിക്കുകയാണ്.