തൊടുപുഴ സ്വകാര്യ ബസ്​സ്റ്റാൻഡിൽ സാമൂഹികവിരുദ്ധ ശല്യം

തൊടുപുഴ: നഗരത്തിലെ സ്വകാര്യ ബസ്​സ്റ്റാൻഡിൽ സാമൂഹികവിരുദ്ധരുടെ ശല്യം വർധിച്ചതായി പരാതി. ബസ്​സ്റ്റാൻഡിലെത്തുന്ന യാത്രക്കാരും വ്യാപാരികളും ഇതുമൂലം ഏറെ പ്രയാസപ്പെടുകയാണ്​. വിഷയം നിരവധിതവണ പൊലീസിന്‍റെ ശ്രദ്ധയിൽപ്പെടുത്തിയിട്ടും തിരിഞ്ഞുനോക്കുന്നില്ലെന്നും പരാതിയുണ്ട്​. സ്റ്റാൻഡ്​ പരിസരത്തെ പല വ്യാപാരശാലകളുടെയും പ്രവേശന കവാടങ്ങളും പടിക്കെട്ടുകളും മദ്യപാനികൾ സ്ഥിരം താവളമാക്കിയിരിക്കുകയാണ്​. സ്റ്റാന്‍റിനടുത്ത്​ കെട്ടിടങ്ങളുടെ ആളൊഴിഞ്ഞ ഭാഗങ്ങളിൽ പട്ടാപ്പകൽ പരസ്യമായി മദ്യപാനം നടന്നിട്ടും അധികൃതർ ഇടപെടുന്നില്ല. മദ്യപിച്ചശേഷം കുപ്പികളും ഭക്ഷണാവശിഷ്ടങ്ങളും അവിടെത്തന്നെ ഉപേക്ഷിച്ചിട്ട് പോകുകയാണ്​. ഇവർ തമ്മിലുള്ള വാക്കുതർക്കങ്ങൾ പലപ്പോഴും കൈ​യേറ്റങ്ങൾക്കും സംഘർഷത്തിനും കാരണമാകുന്നു. പാർസൽ വാങ്ങി ബസിനകത്തും പുറത്തും നിന്ന്​ കഴിക്കുന്നവർ ഭക്ഷണം പൊതിഞ്ഞുകൊടുക്കുന്ന കടലാസുകളും കവറും അവശിഷ്ടങ്ങളും സ്റ്റാൻഡിൽ അലക്ഷ്യമായി നിക്ഷേപിക്കുന്നത്​ മാലിന്യപ്രശ്നത്തിനും ഇടയാക്കിയിട്ടുണ്ട്​. കാക്കകളും തെരുവുനായ്ക്കളും കടിച്ചുവലിച്ച്​ ഇവ അങ്ങിങ്ങായി കൊണ്ടിടുന്നതിനാൽ പല ഭാഗങ്ങളും വൃത്തിഹീനമാണെന്നും വ്യാപരികൾ പറയുന്നു. സ്റ്റാൻഡിൽ പൊലീസ്​ എയ്​ഡ്​പോസ്റ്റ്​ ഉണ്ടെങ്കിലും ഇത്തരം കാര്യങ്ങൾ നേരിട്ട്​ സ്​റ്റേഷനിൽ അറിയിക്കാനാണത്രെ നിർദേശം. മുമ്പ്​ വിഷയം പൊലീസിന്‍റെ ശ്രദ്ധയിൽപ്പെടുത്തിയെങ്കിലും നടപടിയുണ്ടാകാത്തത്​ സാമൂഹികവിരുദ്ധർക്ക്​ സൗകര്യമാകുന്ന അവസ്ഥയാണ്​.