ഡോക്ടറും മരുന്നുമില്ല; മാങ്കുളത്ത് വളർത്തുമൃഗങ്ങൾ ചത്തുവീഴുന്നു

അടിമാലി: ഡോക്ടറും മരുന്നുകളും ഇല്ലാതായതോടെ മാങ്കുളത്ത്​ വളർത്തുമൃഗങ്ങൾ ചത്തുവീഴുന്നു. ജില്ലയിലെ ഏറ്റവും അവികസിത പഞ്ചായത്തായ മാങ്കുളത്തെ മൃഗാശുപത്രിയിലാണ് ഡോക്ടറും മരുന്നും ഇല്ലാത്തത്. ഒരു മാസത്തിനിടെ നാല്​ ആടുകൾ ഉൾപ്പെടെ പത്തിലേറേ വളർത്തുമൃഗങ്ങളാണ് ചത്തത്. ജില്ലയിലെ ഏറ്റവും തിരക്കേറിയ മൃഗാശുപത്രികളിലൊന്നാണ് മാങ്കുളം. ക്ഷീര കർഷകർ കൂടുതലുള്ളതും മാങ്കുളത്താണ്. ഡോക്ടർ ഇല്ലാത്തതിനാൽ രണ്ടുമാസമായി രാത്രികാല പ്രവർത്തനം മുടങ്ങിയിരിക്കുകയാണ്. ഇവിടെനിന്ന്​ 30 കിലോമീറ്റർ അകലെയാണ് വേറെ മൃഗാശുപത്രിയുള്ളത്​. ഇതുമൂലം മൃഗങ്ങളെ വളർത്തുന്നവർ കടുത്ത പ്രതിസന്ധിയിലാണ്. രണ്ട് വർഷം മുമ്പ്​ അജ്ഞാത രോഗം വന്ന് അമ്പതിലേറെ കറവപ്പശുക്കൾ ചത്തിരുന്നു. ഇത് വലിയ പ്രതിഷേധത്തിന് കാരണമായിരുന്നു. തുടർന്നാണ് മൃഗഡോക്ടറെ നിയമിച്ചത്. നാല്​ മാസം മുമ്പ്​ ഈ ഡോക്ടറും പോയതോടെ വീണ്ടും മൃഗാശുപത്രി അനാഥമായി. മൃഗാശുപത്രി മുഖേന പഞ്ചായത്ത് നടത്തുന്ന പദ്ധതി വിഹിത പ്രവർത്തനങ്ങളും മുടങ്ങി​.