ജല അതോറിറ്റിയുടെ കുഴിയിൽ വീണ് യുവാവിന് പരിക്ക്

കാക്കനാട്: പാലാരിവട്ടം കാക്കനാട് സിവിൽ ലൈൻ റോഡിൽ വാഴക്കാലക്ക് സമീപം ജല അതോറിറ്റിക്ക് വേണ്ടി റോഡിലുണ്ടാക്കിയ കുഴിയിൽ വീണ് യുവാവിന് പരിക്ക്. കണ്ണൂർ സ്വദേശി അക്ഷയ്യാണ് കുഴിയിൽ വീണത്. പിറകിൽ മറ്റു വാഹനങ്ങൾ ഇല്ലാതിരുന്നത് രക്ഷയായി.

ഈ റോഡിൽ മാസങ്ങളായി പൈപ്പ് പൊട്ടി വെള്ളം പാഴാകുന്ന സ്ഥിതിയായിരുന്നു. തുടർന്ന് അറ്റകുറ്റപ്പണിക്കായി തൊഴിലാളികൾ എത്തി റോഡ് കുഴിച്ചെങ്കിലും പമ്പിങ് ഇല്ലാത്തതിനാൽ നന്നാക്കാൻ കഴിയാതെ വന്നതോടെ താൽക്കാലികമായി കുഴിയടച്ച് മടങ്ങുകയായിരുന്നു.

ഇതിലാണ് യുവാവ് വീണത്. രാത്രിയായതിനാൽ കുഴി കാണാതിരുന്നതാണ് അപകടത്തിന് കാരണം. പിന്നീട് അപകടം ഒഴിവാക്കാൻ പ്രദേശവാസികൾ മീഡിയൻ സ്ഥാപിച്ചു. സാധാരണയായി കുടിവെള്ള വിതരണമുള്ള ദിവസങ്ങളിലാണ് പൈപ്പ് ലൈനിന്റെ അറ്റകുറ്റപ്പണി ഉൾപ്പെടെയുള്ളവ നടത്തുന്നത്.

ലൈനിലൂടെ വെള്ളം ഒഴുകിയാൽ മാത്രമേ ചോർച്ചയും അറ്റകുറ്റപ്പണി ആവശ്യമുള്ള മറ്റ് സ്ഥലങ്ങളും കണ്ടെത്താനാകൂ. അറ്റകുറ്റപ്പണിക്കായി എത്തിയപ്പോഴായിരുന്നു പമ്പിങ് ഇല്ലെന്ന് മനസ്സിലായത്. പിന്നീട് കുഴി താൽക്കാലികമായി അടച്ച് മടങ്ങുകയായിരുന്നു. അപകടത്തിന് പിന്നാലെ വെള്ളിയാഴ്ച തൊഴിലാളികൾ എത്തി ചോർച്ച മാറ്റി കുഴിയടച്ച് പഴയ രൂപത്തിലാക്കി.