സാഹോദര്യാന്തരീക്ഷം സംരക്ഷിക്കണം–പ്രഫ. എം.കെ. സാനു

കൊച്ചി: സാഹോദര്യത്തി​െൻറ അന്തരീക്ഷം സംരക്ഷിക്കണമെന്ന് പ്രഫ. എം.കെ. സാനു. ഗാന്ധി സ്ക്വയറിൽ യൂനിറ്റി ഫോറം സംഘടിപ്പിച്ച സാഹോദര്യസംഗമം ഉദ്ഘാടനം ചെയ്യുകയായിരുന്നു അദ്ദേഹം. കേരളം ഇരുകൈകളും നീട്ടി എല്ലാവരെയും സ്വീകരിച്ച നാടാണ്. വിവാഹത്തിന് സ്ത്രീ-പുരുഷസ്നേഹം മതിയെന്നാണ് നാരായണ ഗുരു പഞ്ഞത്. ഗുരുവിന് അറിയാവുന്ന ഒരാൾ ജർമനിയിൽ പഠിക്കാൻ പോയി. അവിടെ രോഗം പിടിച്ചുകിടന്നപ്പോൾ പരിചരിച്ച നഴ്​സുമായി അഗാധ സ്നേഹത്തിലായി. ആ യുവതി അദ്ദേഹത്തെ അന്വേഷിച്ച് കേരളത്തിലെത്തി. വിദേശിയാണ്, ക്രിസ്ത്യാനിയാണ് അതിനാൽ വിവാഹം സാധ്യമല്ലെന്ന്​ ചിലർ പറഞ്ഞു. ഒടുവിൽ ആ വനിത ശിവഗിരിയിലെത്തി ഗുരുവിനെ കണ്ടു.

വിവാഹത്തിന് അടിസ്ഥാനം സ്നേഹമാണെന്ന് ഗുരു പഞ്ഞു. വിവാഹം ശിവഗിരിയൽവെച്ച് നടത്തി. മാർഗരറ്റ് കരുണാകരനെ അങ്ങനെയാണ് കേരളം സ്വീകരിച്ചത്​. എന്നാൽ, ഇന്ന് ഇന്ത്യയിലാകെ വ്യാപിക്കുന്ന മതസ്പർധ കേരളത്തിലും വരുകയാണ്. അതിന് പലരും അസത്യം പറയുന്നു. കുമാരനാശാനെ മുസ്​ലിംകൾ കൊന്നുവെന്ന് പറയുന്നത് ഈശ്വരനിന്ദയാണ്. ഗുരുവി​െൻറ നിർദേശമനുസരിച്ചാണ് കുമാരനാശാൻ 'കരുണ' എഴുതിയതെന്നും അതിനാൽ കൊന്നുവെന്നുമാണ് പ്രചാരണം. ആശാ​േൻറത്​ യാദൃശ്ചികമരണമാണ്.

മതവിദ്വേഷത്തിന് ഇത്തരം അസത്യങ്ങൾ ഉപയോഗിക്കുന്നു. നമ്മളിലുള്ളത് മാനവരക്തം എന്ന മുദ്രാവാക്യം ഇനിയും കേരളം വിളിക്കണം. കേരളത്തി​െൻറ മനോഹര പ്രകൃതിയിൽ സ്വാഭാവികമായി വളരുന്ന സാഹോദര്യം വീണ്ടെടുക്കണമെന്നും അദ്ദേഹം ആവശ്യപ്പെട്ടു. പരിപാടിയിൽ സ്വാമി അസ്പർശാനന്ദ, സൈഫുദ്ദീൻ അൽഖാസിം, ഫാ. ബോബി ജോസ് കട്ടിക്കാട്, ഓണമ്പിള്ളി മുഹമ്മദ് ഫൈസി, ഫാ. വിൻസൻറ് കുണ്ടുകുളം, ഷാജി ജോർജ്, ഫൈസൽ അസ്ഹരി തുടങ്ങിയവർ സംസാരിച്ചു.