വിദ്യാര്ഥികളിലെ വാക്സിനേഷന്: എറണാകുളം സൂപ്പറാ...!
text_fieldsകൊച്ചി: സ്കൂള് തുറന്ന് ഒരു മാസമാകുമ്പോള് പരമാവധി വിദ്യാര്ഥികളിലേക്ക് കോവിഡ് വാക്സിന് എത്തിച്ച് ജില്ലയിലെ ആരോഗ്യ പ്രവര്ത്തകര്. വിദ്യാര്ഥി - വാക്സിനേഷന് അനുപാതവുമായി താരതമ്യപ്പെടുത്തുമ്പോള് സംസ്ഥാനതലത്തില് രണ്ടാം സ്ഥാനത്താണ് ജില്ല. 15 മുതല് 17 വയസ്സുവരെയുള്ള 85 ശതമാനം വിദ്യാര്ഥികള്ക്കും 12 മുതല് 14 വയസ്സുവരെയുള്ള 77 ശതമാനം വിദ്യാര്ഥികളിലും ആദ്യ ഡോസ് വാക്സിനേഷന് പൂര്ത്തിയായി.
ഇരുവിഭാഗത്തിലും സംസ്ഥാന ശരാശരിയെക്കാള് മുകളിലാണ് ജില്ലയുടെ സ്ഥാനം.12 മുതല് 17 വയസ്സുവരെയുള്ള 1,88,741 വിദ്യാര്ഥികള്ക്ക് ജില്ലയിൽ ഇതുവരെ ആദ്യ ഡോസ് വാക്സിന് നല്കി. 12 മുതല് 14 വയസ്സുവരെയുള്ള 30 ശതമാനം കുട്ടികള് രണ്ടാം ഡോസ് വാക്സിന് സ്വീകരിച്ചുകഴിഞ്ഞു. 15 മുതല് 17 വയസ്സുവരെയുള്ള 63 ശതമാനം വിദ്യാര്ഥികളാണ് രണ്ടാം ഡോസ് വാക്സിന് സ്വീകരിച്ചത്.
മേയ്, ജൂണ് മാസങ്ങളിലായി ആരോഗ്യവകുപ്പിലെയും വിദ്യാഭ്യാസ വകുപ്പിലെയും ഉദ്യോഗസ്ഥര് നടത്തിയ ശ്രമഫലമായാണ് വിദ്യാര്ഥികളിലെ വാക്സിനേഷനില് മുന്നേറ്റം കാഴ്ചവെക്കാന് സാധിച്ചത്. നിലവില് 25,820 ഡോസ് കോര്ബിവാക്സ് ഡോസുകളാണ് ജില്ലയില് ശേഷിക്കുന്നത്.
മുന്കരുതല് വാക്സിനിലും മുന്നില്
18 വയസ്സിന് മുകളിലുള്ളവര്ക്കുള്ള മുന്കരുതല് വാക്സിന്റെ വിതരണവും ജില്ലയില് പുരോഗമിക്കുകയാണ്. 45 ശതമാനം ആരോഗ്യ പ്രവര്ത്തകരും 40 ശതമാനം കോവിഡ് മുന്നണി പ്രവര്ത്തകരും 60 വയസ്സിന് മുകളിലെ 35 ശതമാനം പേരും മുന്കരുതല് ഡോസ് സ്വീകരിച്ചു കഴിഞ്ഞു.
18 വയസ്സിനും 59 വയസ്സിനുമിടയില് പ്രായമുള്ള എട്ടുശതമാനം പേരാണ് മുന്കരുതല് ഡോസ് എടുത്തത്. ജില്ലയില് ആകെ 19 ശതമാനം പേര് ഇത്തരത്തില് മുന്കരുതല് വാക്സിന് സ്വീകരിച്ചിട്ടുണ്ട്.2,48,835 പേരാണ് മുന്കരുതല് ഡോസ് സ്വീകരിച്ചിട്ടുള്ളത്. ഇതില് 32,708 പേര് ആരോഗ്യപ്രവര്ത്തകരും 19,078 പേര് മുന്നണി പ്രവര്ത്തകരുമാണ്. 60 വയസ്സിനു മുകളിലുള്ള 1,67,699 പേര് മുന്കരുതല് ഡോസ് വാക്സിന് സ്വീകരിച്ചു.
വാക്സിന് പാഴാക്കല് കുറവ് എറണാകുളത്ത്
സംസ്ഥാനത്ത് ഏറ്റവും കുറവ് കോവിഡ് വാക്സിന് പാഴാകുന്ന ജില്ല എന്ന നേട്ടവും എറണാകുളത്തിന്. കോവിഷീൽഡ് വാക്സിനില് -5.05 ആണ് ജില്ലയുടെ പാഴാകുന്ന നിരക്ക്. സംസ്ഥാന ശരാശരി -3.96. കോവാക്സിന് പാഴാകുന്ന നിരക്കില് നെഗറ്റിവ് നിലയിലുള്ള ഏക ജില്ല എറണാകുളം ആണ്.
-0.53 ആണ് ജില്ലയുടെ കോവാക്സിന് പാഴാകല് നിരക്ക്. ബാക്കിയാകുന്ന വാക്സിന് അര്ഹരിലേക്ക് എത്തിക്കുന്നത് മൂലമാണ് വാക്സിന് പാഴാകല് നിരക്ക് ജില്ലയില് നെഗറ്റിവ് നിലയില് എത്തുന്നതിന് സഹായകമായത്. കോര്ബി വാക്സിന് പാഴാകല് നിരക്ക് ജില്ലയില് 6.13 ആണ്. സംസ്ഥാന ശരാശരി ആകട്ടെ 6.19.
Don't miss the exclusive news, Stay updated
Subscribe to our Newsletter
By subscribing you agree to our Terms & Conditions.

