റിക്ഷാവാല ഹമീദിക്ക ഇവിടെയുണ്ട്​, മനസ്സുനിറയെ കൊച്ചിയുമായി

കൊച്ചി: കൊച്ചിക്കാരുടെ അവസാന സൈക്കിൾ റിക്ഷാവാല ഹമീദിക്ക ഇപ്പോൾ മനസ്സിൽ ഓളംവെട്ടുന്ന കൊച്ചി ഓർമകളുമായി അഗതിമന്ദിരത്തിലാണ്​. 55 വർഷം ജ്യൂ സ്​ട്രീറ്റിലും മട്ടാഞ്ചേരിയുടെ തെരുവുകളിലും ത​ന്നോട്​ ഒട്ടിച്ചേർന്ന റിക്ഷയുമായി ഈ മനുഷ്യൻ ചവിട്ടിനടന്നു. 80ാം വയസ്സി​െൻറ അവശതയിൽ രോഗങ്ങൾക്ക്​ മുന്നിൽ വീണുപോയ അദ്ദേഹം ആലുവ വെളിയത്തുനാട്​ വെൽഫെയർ അസോസിയേഷൻ ട്രസ്​റ്റിൽ പരിചരണത്തിലാണ്​. ''കൊച്ചി വിട്ടുപോകാൻ കഴിയില്ലെന്നായിരുന്നു​ ഹമീദിക്കയുടെ നിലപാട്​. ആകെ ബന്ധുവായുള്ളത്​ വയ്യാത്ത സഹോദരിയാണ്​. ഇവർക്ക്​ രണ്ടുപേർക്കും വീടില്ല.

റിക്ഷയിലും കടത്തിണ്ണയിലുമായി ജീവിതം തള്ളിനീക്കിയ അദ്ദേഹത്തെ തീരെ വയ്യാതായതോടെ വെൽ​െഫയർ ട്രസ്​റ്റിലേക്ക്​ എത്തിക്കുകയായിരുന്നു'' -ജില്ല പാലിയേറ്റിവ്​ വളൻറിയറും കൊച്ചിയിലെ സാമൂഹിക പ്രവർത്തകയുമായ കെ.എസ്​. ഫാസില പറയുന്നു.കൊച്ചിയിലെ സൈക്കിൾ റിക്ഷാക്കാരിൽ അവസാനത്തെയാളാണ്​ ഹമീദിക്ക.

ഫോർട്ട്​കൊച്ചിയും മട്ടാഞ്ചേരിയുമൊക്കെ കാണാൻ വരുന്ന വിദേശികളുടെ ഗൈഡായി മാറിയ കഥയാണ്​ അദ്ദേഹത്തി​േൻറത്​. ബോട്ടുജെട്ടിയിൽനിന്ന്​ സഞ്ചാരികളെ കയറ്റി റിക്ഷയിൽ തെരുവുകളിലൂടെ ചവിട്ടി കൊച്ചിയുടെ ജീവിതം അദ്ദേഹം പകർന്നുനൽകി. ഒപ്പം ഫോർട്ട്​കൊച്ചി സെൻറ്​ മേരീസ്​ സ്​കൂളിലെ കുട്ടികളെ എത്തിക്കാനും കൊണ്ടുപോകാനും ഹമീദിക്ക വന്നുപോയി. കണക്കുപറഞ്ഞ്​ കൂലി വാങ്ങാനോ സമ്പാദിക്കാനോ കഴിഞ്ഞില്ല.

കുറെനാളായി കാലിൽ നീരുവന്ന്​ അവശനിലയിലായ അദ്ദേഹം തുടർന്ന്​ ബോട്ടുജെട്ടിക്ക്​ സമീപത്തെ വ്യാപാരികളുടെ കരുതലിലായി. ഒരാഴ്​ച മുമ്പ്​ തീരെ വയ്യാതായതോടെ കടയിൽ കിടപ്പായി. തുടർന്ന്,​ ഡെപ്യൂട്ടി മേയർ കെ.എ. അൻസിയയുടെ ഇടപെടലിൽ ഫാസില, ഹമീദിക്കക്ക്​ വെൽ​െഫയർ ട്രസ്​റ്റിൽ അഭയം ഒരുക്കുകയായിരുന്നു. സാമൂഹിക പ്രവർത്തകനായ സക്കീറും വ്യാപാരിയായ ജലീലും അങ്ങനെ ആലുവയിൽ എത്തിച്ചു.

രക്തത്തിൽ ഹീമോഗ്ലോബി​െൻറ അളവ് തീരെ കുറവായ ഇദ്ദേഹത്തിന് ഇന്ന്​ ബ്ലഡ്​ ട്രാൻസ്​ഫ്യൂഷൻ നടത്തുകയാണ്. കൃത്യസമയത്ത്​ ഭക്ഷണവും ചികിത്സയും കിട്ടിയതോടെ ആരോഗ്യം വീണ്ടെടുക്കുകയാണ്​ ഹമീദിക്ക.