കളമശ്ശേരിയിൽ മണ്ണിടിഞ്ഞ് മരിച്ചവരുടെ എണ്ണം നാലായി VIDEO

കൊച്ചി: കളമശ്ശേരിയിൽ കെട്ടിട നിർമാണത്തിന്​ കുഴിയെടുക്കവെ മണ്ണിടിഞ്ഞുവീണ്​ നാല്​ അന്തർ സംസ്ഥാന തൊഴിലാളികൾ മരിച്ചു. മൂന്നുപേരെ രക്ഷിച്ചു. പശ്ചിമബംഗാൾ സ്വദേശികളായ കൊൽക്കത്ത നോർത്ത്​ 24 പർഗാന അശോക്​ നഗറിൽ ഫൗജുൽ മണ്ഡൽ (30), കൊദൂസ്​ മണ്ഡൽ (35), നൗജേഷ്​ ഷാലി (32), റാലാമിൻ മണ്ഡൽ (30) എന്നിവരാണ്​ മരിച്ചത്​.

എറണാകുളം ഗവ. മെഡിക്കൽ കോളജിനോടുചേർന്ന്​ നെസ്റ്റ്​ ഇലക്​ട്രോണിക്സ്​ സിറ്റിയിൽ വെള്ളിയാഴ്ച ഉച്ചക്ക്​ 2.30നാണ്​ നാടിനെ നടുക്കിയ സംഭവം. മണ്ണിനടിയിൽ പുതഞ്ഞ്​ ശ്വാസംമുട്ടിയാണ് എല്ലാവരുടെയും​ മരണം. മണ്ണിൽ അരയോളം പുതഞ്ഞുകിടന്ന ഫാറൂഖ്​ മണ്ഡൽ (32), ജൈബുൽ മണ്ഡൽ (25), തൊഴിൽ കരാർ ഏറ്റെടുത്ത പശ്ചിമബംഗാൾ സ്വദേശി തന്നെയായ ഷംസ്​ എന്നിവരെ അഗ്​നിരക്ഷാ സേനയും മറ്റും ചേർന്ന്​ രക്ഷപ്പെടുത്തി. ഇവർ എറണാകുളം ഗവ. മെഡിക്കൽ കോളജ്​ ആശുപത്രിയിൽ ചികിത്സയിലാണ്​.

കൂറ്റൻ കെട്ടിടം പണിയാൻ​ തൂണിന്​ കോളം വാർക്കാൻ കുഴിയെടുക്കുകയായിരുന്നു തൊഴിലാളികൾ. 25 അടി താഴ്ചയിലാണ്​ എക്സ്കവേറ്റർ ഉപയോഗിച്ച്​ കുഴിയെടുത്തത്​. ഇതിൽ പത്തടിയോളം മണ്ണിട്ട്​ ഉയരത്തിൽ നികത്തിയ പ്രദേശമാണിത്​. എക്സ്കവേറ്റർകൊണ്ട്​ കുഴിയെടുക്കുമ്പോൾ അരികുകളിൽനിന്ന്​ മണ്ണ്​ നീക്കുന്ന ജോലിയിൽ ഏർപ്പെട്ടതാണ്​ തൊഴിലാളികൾ. 25 അംഗ സംഘമാണ് പണിയെടുത്തിരുന്നത്​. ഉച്ചഭക്ഷണം കഴിഞ്ഞ്​ ആദ്യം പണിക്കിറങ്ങിയ സംഘമാണ്​ അപകടത്തിൽപെട്ടത്​.

മതിയായ സുരക്ഷാ സജ്ജീകരണമില്ലാതെയാണ്​ പണിക്ക്​ ഇറക്കിയതെന്ന്​ രക്ഷപ്പെട്ട ​തൊഴിലാളികൾ ആരോപിച്ചു. ഇടക്കിടെ മണ്ണിടിയുന്നത്​ കണ്ടപ്പോൾ ജോലി ചെയ്യാൻ കഴിയില്ലെന്ന്​ അറിയിച്ചെങ്കിലും കരാറുകാരൻ സമ്മതിച്ചില്ല. ഇതിനിടെ, മണ്ണ്​ കയറ്റിയ ടിപ്പർ ലോറികളിൽ ഒന്ന്​ കുഴിക്ക്​ സമീപത്തുകൂടെ പോയതോടെ അതിന്‍റെ സമ്മർദത്തിൽ മണ്ണിടിഞ്ഞ്​ തൊഴിലാളികളുടെ മുകളിൽ വീഴുകയായിരുന്നു.

മണ്ണിനടിയിൽ പത്തടിയോളം താഴ്ചയിൽനിന്നാണ്​ മൃതദേഹങ്ങൾ കണ്ടെടുത്തത്​​. മൂന്നു മൃതദേഹങ്ങൾ കെട്ടിപ്പുണർന്ന നിലയിലായിരുന്നു. അഞ്ചര മണിക്കൂറോളം നീണ്ട ശ്രമത്തിനൊടുവിലാണ്​ മൃതദേഹങ്ങൾ കണ്ടെടുത്തത്​. അഞ്ചാമത്​ ഒരാൾകൂടി മരിച്ചിട്ടുണ്ടെന്ന്​ സംശയിച്ചെങ്കിലും തൊഴിൽ രേഖകൾ പരിശോധിച്ചാണ്​ ഇല്ലെന്ന്​ ഉറപ്പുവരുത്തിയത്​.

സ്ഥലത്ത്​ എത്തിയ കലക്ടർ ജാഫർ മാലിക്​ നിർമാണം നിർത്തിവെപ്പിച്ചു. പ്രത്യേക സാമ്പത്തിക മേഖലയിൽ ഉൾപ്പെട്ട പ്രദേശത്ത്​ മാനദണ്ഡങ്ങൾ പാലിക്കാതെയാണ്​ നിർമാണങ്ങൾ നടത്തുന്നതെന്ന്​ ആരോപണമുണ്ട്​.