ലാസ്യഭംഗി വിരിയിച്ച് മോഹിനിയാട്ട കച്ചേരി

കാലടി: ഖത്തറിൽ സ്ഥിരതാമസമാക്കിയ 14 വനിതകളുടെ കൂട്ടായ്മയായ നൂപുരധ്വനി ഗുരുവായൂർ മേൽപ്പത്തൂർ ഓഡിറ്റോറിയത്തിൽ മോഹിനിയാട്ട കച്ചേരി അവതരിപ്പിച്ചത് ശ്രദ്ധേയമായി. കലാമണ്ഡലം സീമ രജിതിന്‍റെ നേതൃത്വത്തിൽ മൂന്നു വർഷമായി മോഹിനിയാട്ടം ഓൺലൈൻ വഴി അഭ്യസിച്ച ശേഷമാണ് നൃത്തം അവതരിപ്പിച്ചത്.

ചൊൽകൊട്ട് മുതൽ തില്ലാന വരെയുള്ള ഭാഗങ്ങളാണ് ഒന്നര മണിക്കൂർ ദൈർഘ്യത്തിൽ അവതരിപ്പിച്ചത്. അഞ്ജന, അശ്വതി, ദിവൃ, മൃദുല തുടങ്ങിവർ നേതൃത്വം നൽകി. പക്കമേളം, നട്ടുവാംഗം, വായ്പാട്ട്, മൃദംഗം, വീണ, വയലിൻ, ഇടക്ക എന്നിവയുടെ അകമ്പടിയോടെയാണ് നൃത്തം അവതരിപ്പിച്ചത്.