മെട്രോയിൽ കയറി ആദ്യദിനം ഓഫിസിലെത്തി ബെഹ്​റ

കൊച്ചി: പുതുതായി ചുമതലയേറ്റെടുത്ത കൊച്ചി മെട്രോ ലിമിറ്റഡ് മാനേജിങ് ഡയറക്ടർ മുൻ ഡി.ജി.പി ലോക്നാഥ് ബെഹ്റ ആദ്യദിനം ഓഫിസിലെത്തിയത് മെട്രോയിൽ യാത്ര ചെയ്ത്. തിരുവനന്തപുരത്തുനിന്ന്​ കാറിലെത്തിയ അദ്ദേഹം എം.ജി റോഡ് സ്​റ്റേഷനിൽ നിന്നാണ് മെട്രോ ട്രെയിനിൽ കയറിയത്.

കൊച്ചി സിറ്റി പൊലീസ് കമീഷണർ സി.എച്ച്. നാഗരാജുവും ഒപ്പമുണ്ടായിരുന്നു. മെട്രോയിലെ യാത്രാസൗകര്യങ്ങൾ വിലയിരുത്തിയ അദ്ദേഹം ഓഫിസ് സ്ഥിതി ചെയ്യുന്ന ജെ.എൽ.എൻ സ്​റ്റേഡിയം സ്​റ്റേഷനിൽ ഇറങ്ങി. തുടർന്ന്, ഓഫിസിലെത്തി അദ്ദേഹത്തെ കെ.എം.ആർ.എൽ ജീവനക്കാർ സ്വാഗതം ചെയ്തു. ജീവനക്കാരുമായി സംവദിച്ച അദ്ദേഹം മെട്രോ ഓപറേഷൻ കൺട്രോൾ സെൻറർ സന്ദർശിച്ചു.