ടാർ ചെയ്ത് ഒന്നര ആഴ്ചക്കുള്ളിൽ റോഡ് തകർന്നു തുടങ്ങി

ആലുവ: ടാർ ചെയ്ത് ഒന്നര ആഴ്ചക്കുള്ളിൽ റോഡ് തകർന്നു തുടങ്ങി. ചൂണ്ടി - പുക്കാട്ടുപടി റോഡിൽ എടത്തല തൈക്കാവ് ജംങ്ഷനും എസ്.ഒ.എസിനും ഇടയിൽ തൈക്കാവ് ജംങ്ഷനോട് ചേർന്നുള്ള ഭാഗത്ത്‌ റോഡിന്‍റെ ഒരു ഭാഗം തകർന്ന് തുടങ്ങിയിരിക്കുന്നത്.

അഞ്ച് വർഷം വാറൻറിയുള്ള റോഡ് പുനരുദ്ധാരണമാണ് നടത്തിയിട്ടുള്ളതെന്നാണ് നാട്ടുകാർ പറയുന്നത്. റോഡ് പണിക്കു മുൻപ് തന്നെ ഉണ്ടായിരുന്ന, ഒപ്റ്റിക്കൽ ഫൈബർ ഇടാൻ കുഴിച്ച കുഴി നേരാംവണ്ണം മൂടാതിരുന്നതാണ് പ്രശ്നമായത്. ഇത് ഗൗനിക്കാതെയായിരുന്നു ടാറിങ്. എന്നാൽ, വണ്ടികയറിയപ്പോൾ ഈ ഭാഗം ഇടിഞ്ഞു തുടങ്ങി. ഇത് ശരിയാക്കാൻ കൂടുതൽ സമയമെടുക്കുമെന്നാണ് ഉദ്യോഗസ്‌ഥർ പറയുന്നതെന്ന് നാട്ടുകാർ പറയുന്നു.

പണി പൂർത്തിയായി ഒന്നര ആഴ്ച്ച കഴിഞ്ഞിട്ടും കരാറുകാരന്‍റെ നമ്പറോ എഞ്ചിനീയറുടെ നമ്പറോ പ്രദർശിപ്പിച്ചിട്ടില്ലെന്നും നാട്ടുകാർ ആരോപിക്കുന്നു.