ആലുവ പുഴയിൽ ജലനിരപ്പുയർന്നു; ബലിതർപ്പണം ദേവസ്വം ഹാളിലേക്ക് മാറ്റി - വിഡിയോ

ആലുവ: പുഴയിൽ ജലനിരപ്പ്​ ഉയർന്നതോടെ ശിവക്ഷേത്രത്തിന്‍റെ 95 ശതമാനത്തോളം വെള്ളത്തിനടിയിലായി. ഇതേ തുടർന്ന് പുഴയോരത്ത് നടത്തിയിരുന്ന ബലിതർപ്പണം മണപ്പുറത്തെ ദേവസ്വം ഹാളിലേക്ക് മാറ്റി.

ആലുവയെ സംബന്ധിച്ചിടത്തോളം ശിവക്ഷേത്രം പൂർണമായി മുങ്ങുന്നത് ശിവഭഗവാന്‍റെ ആറാട്ടായി കണക്കാക്കുന്നു. ഈ വർഷം പലതവണ ജലനിരപ്പുയർന്നുവെങ്കിലും ശിവഭഗവാൻ ആറാടിയിട്ടില്ല.

ജലനിരപ്പുയർന്നാലും ക്ഷേത്രത്തിലെ പൂജാദി കർമ്മങ്ങൾ മുടങ്ങില്ലെന്നതാണ് പ്രത്യേകത. ശിവക്ഷേത്രത്തിലേക്ക് വെള്ളം കയറിയെങ്കിലും പെരിയാറിന്‍റെ മറ്റ് പ്രദേശങ്ങളിൽ കാര്യമായി പുഴ കരകവിഞ്ഞിട്ടില്ല.

ഒഴുക്ക് ഗണ്യമായി വർധിച്ചതിനാൽ പുഴയിൽ കുളിക്കാനിറങ്ങുന്നത് ഒഴിവാക്കണമെന്ന് അധികൃതർ അറിയിച്ചു.