Begin typing your search above and press return to search.
exit_to_app
exit_to_app
aluva
cancel
Homechevron_rightNewschevron_rightLocal Newschevron_rightErnakulamchevron_rightAluvachevron_rightഅതിവേഗ റെയിൽവേയും സീ...

അതിവേഗ റെയിൽവേയും സീ പോർട്ട്​ റോഡും; 21 വർഷമായി ആശങ്കയുടെ ട്രാക്കിൽ നാട്ടുകാർ

text_fields
bookmark_border

ആലുവ: അതിവേഗ റെയിൽവേ പദ്ധതിയുമായി സർക്കാർ മുന്നോട്ടുപോകുമ്പോൾ ആശങ്കയുടെ ട്രാക്കിലായിരിക്കുകയാണ് ആലുവ മേഖലയിലെ ഗ്രാമീണർ. നാല് മണിക്കൂർ കൊണ്ട് കാസർകോട്ടുനിന്ന്​ തിരുവനന്തപുരത്ത് എത്തിച്ചേരാവുന്ന നിർദിഷ്​ട അതിവേഗ റെയിൽപാത മേഖലയിലെ വിവിധ ഗ്രാമങ്ങളിലൂടെയാണ് കടന്നുപോകുന്നത്.

ഇതിനായി ആലുവ ഈസ്റ്റ്, ചൊവ്വര, കീഴ്മാട്, നെടുമ്പാശേരി, പാറക്കടവ്, വില്ലേജുകളിലായാണ് ഭൂമി വേണ്ടിവരിക. ഈ പ്രദേശങ്ങളിൽ നിരവധി ജനങ്ങളാണ് തിങ്ങിപ്പാർക്കുന്നത്. പലരുടെയും ഉപജീവന മാർഗമായ കൃഷി ഭൂമികളും ഇതിൽപ്പെടും. ചെറുകിട വ്യാപാര സ്ഥാപനങ്ങളടക്കുള്ള വരുമാന മാർഗങ്ങളും നഷ്​ടമാകാനിടയുണ്ട്. അതിനാൽ തന്നെ ഭൂമി ഏറ്റെടുക്കൽ നടപടി ആരംഭിക്കാനിരിക്കെ ജനങ്ങളിൽ ആശങ്ക വർധിക്കുകയാണ്.

കഴിഞ്ഞ 21 വർഷമായി ജനങ്ങളെ ആശങ്കയിലാക്കി സീ പോർട്ട് - എയർപോർട്ട്​ റോഡും ഇതേ വില്ലേജുകളിലൂടെയാണ് കടന്നുപോകുന്നത്. സീപോർട്ട് - എയർപോർട്ട് റോഡിൻറെ അലൈൻമെൻറ് വർഷങ്ങൾക്ക് മുമ്പ് നടന്നെങ്കിലും ഭൂമി ഏറ്റെടുക്കൽ ആരംഭിച്ചിട്ടില്ല. ഇത് അനിശ്ചിതമായി വൈകിയത് ജനങ്ങളെ കടുത്ത നിരാശയിലാക്കിയിരുന്നു. അടുത്തിടെയാണ് ഭൂമി ഏറ്റെടുക്കാൻ ചർച്ചകൾ പോലും ആരംഭിച്ചത്. ഇക്കാലമത്രയും അലൈൻമെന്‍റ്​ ഭാഗത്തെ ഭൂമി വിൽപ്പന പോലും നടന്നില്ല.

മക്കളുടെ വിവാഹാവശ്യത്തിനും വീട് നിർമിക്കുന്നതിനുമൊക്കെ ഭൂമി വിൽക്കാനുള്ള ഭൂവുടമകളുടെ സ്വപ്നവും വെറുതെയായി. നിരവധി വീടുകളും പുരയിടങ്ങളും കൃഷി ഭൂമികളും ഈ റോഡ് പദ്ധതിയുടെ അലൈൻമെൻറിൽ വരും. ഇതിനിടെയാണ് അതിവേഗ പാതക്ക് ഇതേ വില്ലേജുകളിലൂടെ ഭൂമി ഏറ്റെടുക്കാൻ പോകുന്നത്. ഇതാണ് ആശങ്ക ഇരട്ടിപ്പിക്കുന്നത്.

നിർദിഷ്​ട എയർപോർട്ട് റോഡിന് സമാന്തരമായി അതേ ഭൂമിയിലൂടെ തന്നെ ആകാശ റെയിൽപ്പാത നിർമിക്കാനുള്ള നീക്കം തങ്ങളെ കൂടുതൽ ദുരിതത്തിലാക്കുമെന്നാണ് നാട്ടുകാർ ആശങ്കപ്പെടുന്നത്.

Show Full Article
TAGS:High speed rail 
News Summary - High-speed rail and seaport road; The natives have been on the track of concern for 21 years
Next Story