പ്രളയ ദുരിതാശ്വാസ ഫണ്ട്: 38 രാജ്യസഭ എം.പിമാർ കേരളത്തിന് നൽകിയത് 21.76 കോടി രൂപ

കൊച്ചി: 2018ൽ മഹാപ്രളയം നേരിട്ട കേരളത്തിന് കൈത്താങ്ങാവാൻ രാജ്യസഭ രൂപവത്​കരിച്ച ദുരിതാശ്വാസ ഫണ്ടിലേക്ക് 38 രാജ്യസഭ എംപിമാർ നൽകിയത് 21.76 കോടി രൂപയെന്ന് വിവരാവകാശ രേഖ. കൊച്ചി സ്വദേശിയായ വിവരാവകാശ പ്രവർത്തകൻ കെ. ഗോവിന്ദൻ നമ്പൂതിരിക്ക് സ്​റ്റാറ്റിസ്​റ്റിക്സ് ആൻഡ് പ്രോഗ്രാം ഇംപ്ലിമെ​േൻറഷൻ മന്ത്രാലയം (എം.പി ലാഡ്സ് വിഭാഗം) ഈ മാസം 11ന് നൽകിയ മറുപടിയിലാണ് ഇക്കാര്യം വ്യക്തമായത്. ബാങ്ക് അക്കൗണ്ടിലേക്ക് ക്രെഡിറ്റ് ചെയ്ത ഫണ്ടിൻെറ തൽസ്ഥിതി അനുസരിച്ചുള്ള (2019 ആഗസ്​റ്റ്​ 30) വരെയുള്ള വിവരങ്ങളാണ് ലഭ്യമായത്. സംസ്ഥാനത്തുനിന്ന്​ എ.കെ. ആൻറണി, കെ.കെ. രാഗേഷ്, ബിനോയ് വിശ്വം, എളമരം കരീം, എം.പി. വീരേന്ദ്രകുമാർ, കെ. സോമപ്രസാദ്​ എന്നിവർ എം.പി ഫണ്ടിൽനിന്ന്​ ഒരുകോടി രൂപ നൽകി. മഹാരാഷ്​ട്രയിൽനിന്ന്​ അംഗമായ കേന്ദ്ര വിദേശകാര്യ സഹമന്ത്രി വി. മുരളീധരൻ, രാജസ്ഥാനെ പ്രതിനിധീകരിക്കുന്ന മുൻ കേന്ദ്രമന്ത്രി കെ.ജെ. അൽഫോൻസ് കണ്ണന്താനം എന്നിവരും ഒരുകോടി രൂപ നൽകിയെന്ന് വിവരാവകാശ മറുപടിയിൽ പറയുന്നു. 2018 ആഗസ്​റ്റ്​ 24നാണ് എം.പിമാരുടെ പ്രാദേശിക വികസന പദ്ധതി ഫണ്ടിൽനിന്ന് കേരളത്തിലെ ദുരിതബാധിത പ്രദേശങ്ങളിലെ പുനരധിവാസ പ്രവർത്തനങ്ങൾക്ക് സംഭാവന ചെയ്യാൻ അന്ന് സ്​റ്റാറ്റിസ്​റ്റിക്സ് ആൻഡ് പ്രോഗ്രാം ഇംപ്ലിമെ​േൻറഷൻ മന്ത്രിയായിരുന്ന ഡി.വി. സദാനന്ദ ഗൗഡ അഭ്യര്‍ഥിച്ചത്.