കമ്യൂണിറ്റി വെൽഫെയർ ഫണ്ട്: 2.89 ലക്ഷം പ്രവാസികൾക്ക്​ ഗുണംകിട്ടി

കൊച്ചി: പ്രവാസി ഇന്ത്യക്കാരുടെ ക്ഷേമത്തിന്​ ആരംഭിച്ച ഇന്ത്യൻ കമ്യൂണിറ്റി വെൽഫെയർ ഫണ്ടിൽനിന്ന്​ (ഐ.സി.ഡബ്ല്യു.എഫ്) സഹായത്തിന്​ എത്ര പേർ അപേക്ഷ സമർപ്പിച്ചെന്ന്​ കണക്കില്ലാതെ കേന്ദ്ര വിദേശകാര്യ മന്ത്രാലയം. അതേസമയം, 2014 മുതൽ 2021 വരെ 2,89,800 പ്രവാസികൾക്ക് ഫണ്ടിന്‍റെ ഗുണം ലഭിച്ചെന്ന്​ വിവരാവകാശ മറുപടിയിൽ പറയുന്നു. കൊച്ചി സ്വദേശിയായ വിവരാവകാശ പ്രവർത്തകൻ കെ. ഗോവിന്ദൻ നമ്പൂതിരിക്ക് കേന്ദ്ര വിദേശകാര്യ മന്ത്രാലയം ഈ മാസം ഒന്നിന് നൽകിയ മറുപടിയിലാണ് ഈ വിവരങ്ങൾ. 2018-21 വരെ 399 കോടി രൂപ ഐ.സി.ഡബ്ല്യു.എഫിലേക്ക് പിരിച്ചിട്ടുണ്ട്. 2014-21 കാലയളവിൽ 484 കോടി രൂപ ചെലവഴിച്ചു. 2021 ഡിസംബർ 31 വരെയുള്ള കണക്ക് അനുസരിച്ച്​ 479 കോടി രൂപ ഫണ്ടിൽ ബാക്കിയുണ്ടെന്നും മന്ത്രാലയം മറുപടിയിൽ വ്യക്തമാക്കി. അപേക്ഷകൾ എത്ര ദിവസത്തിനുള്ളിൽ പരിഹരിക്കുമെന്ന ചോദ്യത്തിന് അടിയന്തര പ്രാധാന്യത്തോടെ തീർപ്പാക്കുമെന്ന് പറയുന്നു. എംബസിയുമായി ബന്ധപ്പെട്ട സേവനങ്ങൾക്ക് ഓരോ പ്രവാസിയിൽനിന്നും ഫീസ് ഈടാക്കുന്നുണ്ടെങ്കിലും ക്ഷേമത്തിന്​ ഐ.സി.ഡബ്ല്യു.എഫിൽനിന്ന് ചെലവഴിക്കുന്ന തുക തുച്ഛമാണെന്ന് ഗോവിന്ദൻ നമ്പൂതിരി ചൂണ്ടിക്കാട്ടി.