ബ്രഹ്​മപുരത്ത്​ 28 ശതമാനം ബയോ മൈനിങ്​ പൂർത്തീകരിച്ചു

കൊച്ചി: ബ്രഹ്​മപുരം ഡമ്പിങ്​ യാർഡിൽ പതിറ്റാണ്ടുകളായി അടിഞ്ഞുകൂടിയ മാലിന്യ കൂമ്പാരത്തിൽ 28 ശതമാനം ബയോ മൈനിങ്​ പൂർത്തിയായതായി തദ്ദേശ ഭരണവകുപ്പിന്‍റെ റിപ്പോർട്ട്​. ഈ വർഷം ജനുവരി 15നാണ്​ കരാർ ഏറ്റെടുത്ത സോൺട ഇൻഫ്രാ ടെക്​ ലിമിറ്റഡ്​ കമ്പനി പ്രവൃത്തി തുടങ്ങുന്നത്​. സാ​ങ്കേതിക പ്ലാൻ അനുസരിച്ച്​ 18 മാസത്തിനകം ബയോ മൈനിങ്​ പൂർത്തിയാക്കണം. പത്തേക്കർ ഭൂമിയിലെ മാലിന്യങ്ങൾ നീക്കി ഭൂമി വീണ്ടെടുത്തതായി റിപ്പോർട്ടിൽ പറയുന്നു. പദ്ധതിക്കായി 7.15 കോടി രൂപ മൊബിലൈസേഷൻ അഡ്വാൻസായി കമ്പനിക്ക്​ കൊച്ചി കോർപറേഷൻ നൽകിയിട്ടുണ്ട്​. വൻകിട യന്ത്രങ്ങളും 65 തൊഴിലാളികളും പദ്ധതിയുമായി ബന്ധപ്പെട്ട്​ പ്രവർത്തിക്കുന്നു. വർഷങ്ങളായി കുന്നുകൂടിക്കിടക്കുന്ന മാലിന്യങ്ങളും അവയിൽനിന്ന്​ കടമ്പ്രയാറിലേക്ക്​ ഒഴുകുന്ന മലിനജലവുമാണ്​ ബ്രഹ്​മപുരത്തെ പ്രശ്​നം. പ്ലാസ്റ്റിക്​ അടക്കമുള്ള ഖര മാലിന്യങ്ങൾ വേർതിരിച്ചെടുത്ത്​ ജൈവ മാലിന്യങ്ങൾ സംസ്കരിക്കുന്നതാണ്​ ബയോ മൈനിങ്​. ഖരമാലിന്യങ്ങൾ പുനചംക്രമണം നടത്തുകയോ വിൽക്കുകയോ ചെയ്യും. ഭൂമി വീണ്ടെടുത്ത്​ നിരപ്പാക്കി കൈമാറുകയാണ്​ കമ്പനിയുടെ ചുമതല. കോഴിക്കോട്​ എൻ.ഐ.ടി നടത്തിയ സർവേയിൽ 55.91 ക്യുബിക്​ മീറ്റർ മാലിന്യമാണ്​ 40.25 ഏക്കർ വരുന്ന പ്രദേശത്ത്​ കെട്ടിക്കിടക്കുന്നതായി കണക്കാക്കിയത്​. മൊത്തം സ്ഥലം ഏഴ്​ സെക്ടറുകളായി തിരിച്ചാണ്​ പ്രവൃത്തികൾ നടത്തുന്നത്​. ബയോ മൈനിങ്ങിലൂടെ ബ്രഹ്​മപുരത്തെ 80 ശതമാനം ഭൂമിയും പൂർവ സ്ഥിതിയിൽ എത്തിക്കാൻ കഴിയുമെന്നാണ്​ പ്രതീക്ഷ. കൊച്ചി കോർപറേഷനിലെ 74 ഡിവിഷനുകളിലെ 1,67,935 വീടുകളി​ലെ 1,50,730 വീടുകളിൽനിന്ന്​ ജൈവ അജൈവ മാലിന്യങ്ങൾ വാതിൽപടി സംഭരണം നടത്തുന്നുണ്ട്​. ഇതുകൂടാതെ അഞ്ച്​ മുനിസിപ്പാലിറ്റികൾ, മൂന്ന്​ പഞ്ചായത്തുകൾ എന്നിവിടങ്ങളിൽനിന്നും മാലിന്യം സംഭരിക്കുന്നു. ആകെ 326 ടൺ മാലിന്യത്തിൽനിന്ന്​ 20 ടൺ വീടുകളിൽതന്നെ ബയോ കമ്പോസ്റ്റിങ്​ നടത്തുന്നുണ്ട്​. ബാക്കി 306 ടണ്ണാണ്​ ദിനംപ്രതി ബ്രഹ്​മപുരം ഡമ്പിങ്​ യാർഡിൽ തള്ളുന്നത്​. ജൈവമാലിന്യങ്ങൾ ബ്രഹ്​മപുരത്തെ വിൻഡ്രോ കമ്പോസ്റ്റിങ്​ പ്ലാന്‍റിൽ സംസ്കരിച്ച്​ വളമാക്കി മാറ്റുന്നുണ്ടെന്നും റിപ്പോർട്ടിലുണ്ട്​. ദിനംപ്രതി 250 ടൺ മാലിന്യ സംസ്കരണത്തിന്​ ശേഷിയുള്ളതാണ്​ നിലവിലെ പ്ലാന്‍റ്​. അത്​ തകർച്ച നേരിടുകയാണെങ്കിലും മാലിന്യം കൈകാര്യം ചെയ്യുന്നത്​ ഇവിടെ തന്നെയാണ്​. അതിൽ നിന്നുള്ള മലിനജലം 130 ക്യുബിക്​ മീറ്റർ ശേഷിയുള്ള ടാങ്കിൽ സംഭരിച്ച്​ സെപറ്റേജ്​ ട്രീറ്റ്​മെന്‍റ്​ പ്ലാന്‍റിലേക്ക്​ കൊണ്ടുപോകുന്നുണ്ട്​.