അസി. പാസ്​പോർട്ട്​ ഓഫിസർക്ക്​ 25,000 പിഴ: സിംഗിൾ ബെഞ്ച്​ വിധി റദ്ദാക്കി

കൊച്ചി: പാസ്​പോർട്ട് പുതുക്കാനുള്ള അപേക്ഷയിൽ അനാവശ്യ എതിർപ്പുന്നയിച്ചതിന്​ അസി. പാസ്​പോർട്ട്​ ഓഫിസർക്ക്​ സിംഗിൾബെഞ്ച്​ വിധിച്ച 25,000 രൂപയുടെ പിഴ ഡിവിഷൻ ബെഞ്ച്​ റദ്ദാക്കി. കോട്ടയം പാസ്‌പോർട്ട് സേവാകേന്ദ്രത്തിലെ അസി. പാസ്​പോർട്ട് ഓഫിസർക്കെതിരായ വിധിയാണ്​ ചീഫ്​ ജസ്റ്റിസ്​ അടങ്ങുന്ന ഡിവിഷൻ ​ബെഞ്ച്​ റദ്ദാക്കിയത്​. സിംഗിൾ ബെഞ്ച്​ വിധിയിലുണ്ടായിരുന്ന പരാമർശങ്ങളും നീക്കി. വിധിക്കെതിരെ കേന്ദ്രസർക്കാറും അസി. പാസ്​പോർട്ട് ഓഫിസറും നൽകിയ അപ്പീലാണ്​ ഡിവിഷൻ ബെഞ്ച്​ പരിഗണിച്ചത്​. വിവാഹമോചിതയായ ഏറ്റുമാനൂർ സ്വദേശിനി മകളുടെ പാസ്​പോർട്ട്​ പുതുക്കാൻ നൽകിയ അപേക്ഷയിൽ അനാവശ്യമായി എതിർപ്പുന്നയിച്ച്​ കോടതി നടപടികളിലേക്ക് എത്തിച്ചെന്നായിരുന്നു സിംഗിൾ ബെഞ്ചിന്റെ നിരീക്ഷണം. വിവാഹമോചനം നേടിയെന്ന കോടതി ഉത്തരവും കുട്ടിയുടെ ഉത്തരവാദിത്തം തനിക്കാണെന്ന് വ്യക്തമാക്കുന്ന ഫോം-സിയും ഹരജിക്കാരി നൽകിയിരുന്നു. ഇതോടൊപ്പം നൽകിയ ഡിക്ലറേഷനിൽ കുട്ടിയുടെ പിതാവിന്റെ ഒപ്പില്ലാത്തതിനാൽ അദ്ദേഹത്തിന്‍റെ അനുമതിയോ കോടതി ഉത്തരവോ ഹാജരാക്കാൻ അസി. പാസ്​പോർട്ട് ഓഫിസർ നിർദേശിച്ചു. തുടർന്ന്​ നൽകിയ ഹരജിയിലാണ്​ സിംഗിൾ ബെഞ്ചിൽനിന്ന്​ ഉത്തരവുണ്ടായത്​. ഭരണപരമായ നടപടിക്രമങ്ങൾ പാലിച്ച് സദുദ്ദേശ്യത്തിലാണ് ഇത്തരമൊരു നിർദേശം നൽകിയതെന്നും ഹരജി സിംഗിൾ ബെഞ്ച് പരിഗണിക്കുന്നതിനിടെ പാസ്​പോർട്ട്​ പുതുക്കി നൽകിയെന്നും അപ്പീലിൽ ഓഫിസർ വ്യക്തമാക്കി. തുടർന്നാണ്​ സിംഗിൾ ബെഞ്ച്​ ഉത്തരവും പരാമർശങ്ങളും ഡിവിൻ ബെഞ്ച്​ റദ്ദാക്കിയത്​.