കൊച്ചി കോർപറേഷൻ: 224.76 കോടിയുടെ ജനകീയാസൂത്രണ പദ്ധതികൾക്ക് കൗൺസിൽ അംഗീകാരം

കൊച്ചി: കോർപറേഷനിൽ 224.76 കോടി ജനകീയാസൂത്രണ പദ്ധതികൾക്ക് കൗൺസിൽ അംഗീകാരം. നഗരത്തിലെ വെള്ളക്കെട്ടിനും തകർന്ന റോഡുകളുടെ പുനരുദ്ധാരണത്തിനും മുൻതൂക്കം നൽകി ജനകീയാസൂത്രണ ഫണ്ട്​ ചെലവഴിക്കുമെന്നും അടുത്ത ദിവസങ്ങളിൽ തന്നെ അതിനായുള്ള ഊർജിത ശ്രമങ്ങൾ ആരംഭിക്കുമെന്നും മേയർ അനിൽ കുമാർ പറഞ്ഞു. കോർപറേഷ‍‍ൻെറ പ്രത്യേകയോഗത്തിൽ സംസാരിക്കുകയായിരുന്നു അദ്ദേഹം. 224.76 കോടിയാണ്​ ഇതിനായി നീക്കിവെച്ചിരിക്കുന്നത്​. അത്​ ഒമ്പതു​ മാസത്തിനുള്ളിൽ ചെലവഴിക്കേണ്ടതുണ്ട്​. കൗൺസിൽ അംഗങ്ങളുടെ സഹകരണം ഉണ്ടാകണമെന്നും അദ്ദേഹം പറഞ്ഞു. വെള്ളക്കെട്ടി‍ൻെറ പരിഹാരത്തിന്​ മുന്തിയ പരിഗണന നൽകി പൊതുസമീപനം സ്വീകരിക്കും. അതിനായി പ്രത്യേക കമ്മിറ്റി ചേർന്ന്​ നടപടി സ്വീകരിക്കും. മുല്ലശേരി കനാലി‍ൻെറ കാര്യത്തിൽ പ്രത്യേക പരിഗണന സ്വീകരിക്കേണ്ടതുണ്ട്​. റോഡുകളുടെ കാര്യത്തിലും ഗൗരവമായ സമീപനം ഉണ്ടാകും. 71 ഡിവിഷനുകളിലെയും പ്രധാന റോഡുകൾ എല്ലാം തന്നെ നവീകരിക്കേണ്ടതുണ്ട്​. പ്ലാൻ ഫണ്ടിൽപെടുത്തി അതിന്​ പരിഹാരം കാണും. പ്ലാൻ ഫണ്ടിൽപെടുത്തി 145 പേർക്ക്​ ഇ-ഓട്ടോ വാങ്ങി നൽകും. ഇതിനായി 74 ലക്ഷം രൂപ ചെലവഴിക്കും. 2.6 ലക്ഷം രൂപ വിലവരുന്ന ​ഓട്ടോക്ക്​ 80,000 രൂപ സബ്​സിഡി ആയാണ്​ ലഭ്യമാക്കുക. ബാക്കി തുക വായ്പയായി ലഭ്യമാക്കും. 1.93 കോടി ചെലവഴിച്ച്​ 17 പട്ടികജാതി കുടുംബങ്ങൾക്ക്​ വീടുവെച്ച്​ നൽകും. രണ്ട്​ ഡിവിഷനുകളിൽ ഫുട്​ബാൾ ടർഫ്​ നിർമിക്കും. പാലിയേറ്റിവ്​ മേഖലയിൽ പ്രവർത്തിക്കുന്ന വനിതകൾക്ക്​ ഇരുചക്രവാഹനം വാങ്ങാൻ 14.59 ലക്ഷം രൂപ അനുവദിച്ചിട്ടുണ്ട്​. ആദ്യഘട്ടത്തിൽ 34 പേർക്കാണ്​ വാഹനം നൽകുക. ​പ്രതിപക്ഷ നേതാവ് ആന്‍റണി കുരീത്തറ, മിനിമോൾ, അരിസ്റ്റോട്ടിൽ എന്നിവർ ചർച്ചയിൽ പങ്കെടുത്ത്​ സംസാരിച്ചു.